Foto: kupibilet.ru
Máselen, bir otbasynan 4 adam ár qaısysyna 23 kelige deıin júk alýǵa ruqsat etiletin bıletti satyp alady. Is júzinde olar 30 kelilik eki chemodandy tapsyrady. Áýe kompanııalary osy tusta chemodan salmaǵynyń belgilengen normadan asyp ketkenin aıtyp, 40 myń teńge qosymsha aqy talap etedi. Bul ushý qunyn taǵy da 15-20 paıyzǵa qymbattatyp jiberedi. Fraksııa saýalyn joldaǵan depýtat Nıkolaı Arsıýtın mundaı jaǵdaıda otbasyǵa tıesili jalpy júkti biriktirýdi, oǵan qosymsha qarjy almaý tetigin qaraýdy usyndy.
Depýtat QR Bas kólik prokýratýrasy birge saıahattaıtyn otbasy músheleriniń jol júgin biriktirý normasyna tyıym salmaǵanmen, áýe kompanııalary bul normany eskermeı otyrǵanyn atap ótti. Sondaı-aq, EO elderindegi jolaýshylardyń quqyn qorǵaý boıynsha dırektıvalar jolaýshylardyń júgin biriktirýde olar úshin qolaıly jaǵdaı jasaıtynyn qaperge saldy.
Osyǵan baılanysty depýtat Premer-mınıstrdiń birinshi orynbasary R.Sklıar atyna birneshe usynys joldap, qaıta qaraýdy surady.
«Birinshi – normatıvtik quqyqtyq aktilerde (onyń ishinde jolaýshylar men bagajdy tasymaldaý qaǵıdalarynda) jolaýshylardyń, eger olar bir bıletpen júretin bolsa, bagaj normalaryn ózara biriktirý quqyǵyn belgileý. Bul tájirıbe ishki jáne halyqaralyq reısterdi oryndaıtyn barlyq avıakompanııalar úshin mindetti bolýy kerek;
Ekinshisi – osy talaptardy oryndamaý, áýe kompanııalary tarapynan teris paıdalaný jáne josyqsyz áreketter úshin jaýapkershilik (sanksııalar) engizý arqyly osy standarttardy oryndaýǵa baqylaý ornatý;
Úshinshiden, tasymaldaý erejelerine avıakompanııalarǵa bıletterdi brondaý kezinde jolaýshylarǵa bagajdy biriktirý múmkindigi týraly aqparat berýdi talap etetin erejeni engizý. Áýe tasymaldaýshylary bıletterdi satyp alý satysynda, sondaı-aq tirkeý kassalarynda jáne resmı saıtynda klıentterdi bagajdy biriktirý quqyǵy týraly habardar etýge mindetteý;
Tórtinshiden, birqatar elde, sonyń ishinde Eýropalyq Odaq pen AQSh-ta básekege qabilettilik deńgeıin jáne jolaýshylardyń suranysyn oryndaý deńgeıin arttyrýǵa múmkindik beretin mundaı tájirıbeler sátti engizilgenin eskere otyryp, halyqaralyq tájirıbe men zańnamany baǵalaý kerek», dedi N. Arsıýtın.
Ol saýalynyń sońynda mundaı sharalar azamattar úshin bagajdy tasymaldaý jaǵdaılaryn jaqsartýǵa, olardyń quqyǵyn qorǵaýǵa, azamattardyń qazaqstandyq avıakompanııalarǵa senim deńgeıin arttyrýǵa jáne halyqaralyq standarttarǵa saı ádil qyzmet kórsetý júıesin qurýǵa yqpal etetinine senim bildirdi.
