«Bilimland»
Balalarǵa sıfrlyq bilim berý salasynda aıtarlyqtaı jumys atqarǵan otandyq jobanyń biri – «Bilimland». Bul joba – bilimniń qoljetimdi ári sapaly bolýyna baǵyttalǵan, tehnologııa men mazmundy úılestire alǵan erekshe ekojúıe. Platforma 2011 jyldan bastap úzdiksiz damyp keledi. «Bilimdige dúnıe jaryq» degen sózdiń salmaǵy qazir burynǵydan da artyp, ár balanyń taǵdyryna áser etetin faktorǵa aınaldy. Baǵdarlamada bala úshin qyzyqty, este qalatyn anımasııalyq vıdeolar, zamanaýı trenajerler men sımýlıatorlar, ártúrli deńgeıdegi ınteraktıvti tapsyrmalar jınaqtalǵan. Muǵalimderge ádistemelik kómek alýǵa, ata-analarǵa balasynyń bilim alýyn baqylaýǵa, oqýshyǵa – bilimdi oıyn túrinde ıgerýge jol ashyq. «Bilimland» tek tehnıkalyq ónim emes. Onyń artynda bilim salasyn jete biletin kásibı muǵalimder men ádiskerler, shynaıy shyǵarmashylyq ıeleri – anımatorlar men dızaınerler, mazmunǵa jan bitirgen redaktorlar men tehnar-programmıster tur.
Olar tek vızýaldy nemese tehnıkalyq sapaǵa emes, pedagogıkalyq mánge de asa nazar aýdarady. «Bilimland» ustanatyn basty qaǵıda – bilimdi barshaǵa qoljetimdi etý. Kompanııa elimizdegi elektrondy oqytý naryǵynyń negizin qalaýshylardyń biri retinde oqýshy men muǵalimdi ǵana emes, ata-analardy da qamtýǵa tyrysady. Ár bala bilim alýy úshin erekshe tásildi qajet etedi. Osyny eskergen «Bilimland» kontentti jasaıtyn kezde balanyń qabyldaý qabiletine, qyzyǵýshylyǵyna beıimdeıdi. Bul – erteńgi urpaqtyń talabyna jaýap bere alatyn az jobalardyń biri.
«iBars Kids»
Bala oıyny – bolashaqtyń tárbıesi. Qazir uıaly telefon ustaǵan baldyrǵan qurylǵyny bizden jyldam meńgeredi. Endeshe, olardyń qolyndaǵy telefonda ne bar – sol mańyzdy. Osy turǵydan kelgende, «iBars Kids» – oıyn arqyly oılandyratyn, qyzyqtyra otyryp damytatyn qazaqtildi alǵashqy mobıldi qosymsha. Ol jaı qosymsha emes, sábıdiń sóıleý qabiletin ushtap, logıkasyn jetildiretin sıfrlyq kómekshi.
2-5 jas aralyǵyndaǵy balalarǵa arnalǵan qosymshada mıdy damytýǵa arnalǵan oıyn formatyndaǵy tapsyrmalar jınaqtalǵan. Ásirese «Intellekt» pen «Logıka» bólimderi balanyń oılaý qabiletin shıratyp, tanym kókjıegin keńeıtedi. Matematıka álemine alǵashqy qadam jasaǵysy keletin balaqaılarǵa arnalǵan «Sandar» bólimi de bar. Al úsh tildi qatar meńgertý – búgingi zaman talaby. Sol sebepti «iBars Kids» qosymshasy arqyly balalar qazaq, orys, aǵylshyn tilin qatar úırene alady. Qosymshada balalar tek jattap qana qoımaı, shyǵarmashylyqqa da bet burady. «Boıamaq» bóliminde álem mýltfılmderindegi keıipkerlerdi boıaý arqyly balanyń qııaly men sezimi qatar damıdy. Eń bastysy – qosymshada sapaly dybystyq súıemeldeý bar. Bul sábıdiń sóz tanýyna, sóıleý tiliniń qalyptasýyna oń áser etedi. Jobanyń avtory, «IT»-kásipker Qazbek Saǵıdolla bul bastamany jaı bıznes emes, ultqa qyzmet dep biletinin aıtady. «Oıynymyz balalarǵa barynsha qyzyqty bolýy úshin erekshe pedagogıkalyq tásilderdi, jarqyn dızaın men sapaly dybystyq súıemeldeýdi paıdalandyq. Qazirgi tańda mobıldi oıynymyz respýblıkalyq, halyqaralyq naryqqqa shyqty. Aldaǵy ýaqytqa bizdiń josparlarymyz orasan. Qazirgi kezde oıynnyń kompıýterlik nusqasy da bar», deıdi startap negizin qalaýshy.
«iBars Kids» qosymshasyn «App Store» men «Google Play» dúkenderinen júktep alýǵa bolady. Eń bastysy, bul qosymsha balanyń bilimge degen alǵashqy qadamyn ana tilinde bastaýyna múmkindik beredi.
«BalaTime»
«BalaTime» – zamanaýı balalardyń kún tártibin ońtaıly uıymdastyrýǵa arnalǵan mobıldi qosymsha. Ata-ananyń da, balanyń da ýaqytyn júıelep, tártipke shaqyrady. Balaqaıdyń uıqy ýaqyty, tamaqtanýy, serýeni, tipti ekran aldyndaǵy ýaqyty – barlyǵyn júıeli baqylaýǵa bolady. Sıfrlyq kómekshi balanyń kún tártibin qalyptastyryp qana qoımaı, onyń psıhologııalyq jaı-kúıin de nazarda ustaıdy. Eń bastysy, «BalaTime» – qazaqtildi kontentti damytýdy kózdeıtin sanaýly jobanyń biri. Onyń ınterfeısi de, mazmuny da ana tilimizde. Ulttyq rýhty jańa tehnologııamen úndestirip, balanyń kúnin paıdaly ári tártipti ótkizýge baǵyttalǵan «BalaTime» – XXI ǵasyrdyń sanaly urpaǵyn tárbıeleýdegi tamasha qural.
«Kıber Tumar»
Balaǵa tumar taqqan jurtpyz. Biraq búgingi ǵasyrda tumar tek moıynǵa taǵylatyn kózmonshaq emes, sıfrlyq álemde qorǵan bolatyn sıfrlyq joba. Internet kún sanap balalardyń kúndelikti ómiriniń ajyramas bóligine aınalyp keledi. IýNISEF usynǵan derekterge súıensek, balalardyń ınternetti qoldaný jasy jyl ótken saıyn kishireıip barady. Balanyń qııalyn oıatar, shyǵarmashylyǵyn ushtar múmkindik mol bolǵanymen, ınternet olardy qaýip-qatermen betpe-bet qaldyryp otyr. Ásirese qyz balalar jıi kıberbýllıng qurbanyna aınalady. Osy syn-qaterge tosqaýyl bolý úshin IýNISEF-tiń Qazaqstandaǵy ókildigi Eýropalyq Odaqpen, Oqý-aǵartý mınıstrliginiń Balalardyń quqyqtaryn qorǵaý komıtetimen jáne Peremena.media platformasymen birlese otyryp, «Kıber Tumar» atty mańyzdy jobany iske qosty. Bul – balalarǵa sıfrlyq qaýipsizdik mádenıetin úıretetin platforma. Maqsat – sıfrlyq saýatty urpaq tárbıeleý.
