Foto: freepik.com
Arnaıy kýrstarda oqyǵan pedagogter el mektepterinde kásiptik baǵdar berý qyzmetin atqaryp, oqýshylardyń durys mamandyq tańdaýyna ózindik úles qosyp keledi.
Eske salaıyq, bıyl 31 naýryzda orta bilim berý uıymdarynda Memleket basshysynyń tapsyrmasyna sáıkes pedagog-kásiptik baǵdar berýshi laýazymy resmı túrde bekitilip, salany odan ári damytý kózdeldi.
Al, kúni keshe Ortalyq kommýnıkasııalar qyzmetindegi brıfıng barysynda erte kásibı baǵdar berý týraly Oqý-aǵartý mınıstri Ǵanı Beısembaev «Keleshek mektepteri» jobasy aıasynda salynǵan mektepterde bastaýysh synyptardan bastap túrli mamandyq ıelerimen kezdesýler uıymdastyrylatynyn, 7-synypta oqýshylar úshin tereńdetilgen beıindik oqytý, tálimgerlik júıesi jáne jeke bilim berý kýrstary engiziletinin, atalǵan jaıttar boıynsha ázirlenip jatqan arnaıy sıfrlyq platforma – oqýshylarǵa bolashaq kásibı baǵytyn jáne ári qaraıǵy bilim alý jolyn sanaly túrde tańdaýǵa septesetinin atap ótti.
Aıta ketelik, qazirgi ýaqytta mektepterdegi kásiptik baǵdar berý jumysynyń negizgi mindetteri boıynsha oqýshylarǵa mamandyqtar týraly túsinikter berilip, kásiptik qyzyǵýy men beıimdiligin, qabilettiligin qalyptastyrý-damytý úshin oqýshynyń dara erekshelikteri zertteledi. Sonymen qosa, mektep bitirýshilerge mamandyq tańdaýǵa kómek jasalyp, oqýshylardy belgili bir mamandyqtyń túrin meńgerýge beıimdeý jumysy júrgiziledi.
9-11 synyptarda beıindi oqytýǵa kóshý arqyly oqýshylardyń mamandyq tańdaýyna septesý kózdelip, osy kezeńde jas urpaqtyń bolashaǵy úshin negizgi kómekke mektep proferıontologtary keletini málim.
Mektepterdegi kásiptik baǵdar berýdiń jalpy jaı-japsary týraly Túrkistan oblysynyń Shardara aýdanyna qarasty «Syrdarııa» JBBM-niń beıindik oqytý isi jónindegi dırektordyń orynbasary Baqtygúl Bektastyń aıtýynsha, joǵary synyptarda jekelegen pánder tereńdete oqytylyp, sonyń nátıjesi oqýshy, ata-ana, psıholog jáne synyp jetekshisiniń birlesken jumystarymen, onyń ishinde saýalnamalar arqyly anyqtalyp otyrady.
«Beıindi synyptarǵa oqýshylardyń belgili bir mamandyqqa ıkemdiligin anyqtaý jumystary ata-analardyń talaptary jáne jazbasha ótishteri boıynsha da júıeli túrde iske asyp keledi», deıdi Baqtygúl Aıdarhanqyzy.
Mektepterde oqýshylardyń bolashaq baǵyty men oqý oryndaryn tańdaý máselesin sheshý úshin kolledjdermen jáne ýnıversıtettermen yntymaqtastyq jumysy uıymdastyrylatyny málim.
«Mektep bitirýshi túlekterge durys tańdaý jasaýyna keń túsinik bere otyryp, kóp salaly oqý oryndarymen onlaın-oflaın kezdesý basty maqsatymyzdyń biri. Jalpy aıtqanda, mektebimizde ata-analar men oqýshylarǵa zamanaýı jańa mamandyqtarmen tanystyryp, keńinen aqparattandyrý jumystary, ashyq sabaqtar, mamandarmen kezdesýler jáne dóńgelek ústelder jıi ótip jatady», dedi B.Bektas.
B.Aıdarhanqyzy keleshekte jumysshy bolatyn balalardy anyqtaý máselesine de toqtaldy.
«Jalpy qarapaıym jumysshy bolatyn balalardy ata-analaryna aýyl sharýashylyǵyndaǵy túrli eńbek daǵdysyn ıkemdi ıgerýi turǵysynda jáne oqýshylardyń bilim, bilik, beıin daǵdysy boıynsha áleýmettik saýalnama suraqtaryna jaýaptary arqyly anyqtap otyrmyz», deıdi Baqtygúl Bektas.
Qazaqstanda proforıentasııa salasy damyp kele jatyr. Keleshekte kolledjder men JOO-larda kásibı baǵyt-baǵdar berý arnaıy mamandyq retinde oqytylsa, qoǵam odan ári órkendeıtini sózsiz.
