Basqarmadaǵylar Qaraqum aýyldyq okrýgindegi Kókasha eldi mekeninde zııankester turǵyn úıler aýlasyna deıin jetkenin aıtady. Qazir Kókashadaǵy 4 úı tolyq baqylaýǵa alynyp, qajetti sharalar qolǵa alyndy. Qalǵan aýyldyq okrýg ortalyqtarynda mundaı derekter tirkelmegen.
Bıyl zııankester jyldaǵydan erte «oıanyp», sáýir aıynyń sońynda baıqala bastaǵan. Sáýirdiń sońynda Qaraqum aýyldyq okrýgine qarasty Aıdarly shoqalaq, Izbanqumy, Tórtqara óńirlerinde, sondaı-aq Sazdy aýyldyq okrýgindegi Báısembaı qumy, Tazsha tóbe jáne Eskene óńirlerinde ıtalııalyq prýstyń dernásilderi anyqtalypty. Sál keıin Aqqum okrýgindegi Teńizbaı qumy men Aıtjantaban aýmaqtarynan, al 5 mamyrda Qosaman men Jińishkequm aýyldyq okrýgterinen de zııankesterdiń belsendiligi baıqala bastaǵan. Osyǵan baılanysty keıin kóktemgi-jazǵy maýsymǵa arnalǵan monıtorıng jumystary shuǵyl túrde bastalyp, naqty óńdeý aýmaqtary men tehnıka túrleri anyqtalyp, iske qosyldy. Aqqum, Qaraqum, Jińishkequm jáne Qosaman aýyldyq okrýgterindegi sharýashylyq jerlerinde 5 jer agregaty, Qaraqumda 2 asa jeńil ushaq, Sazdyda 3 dron kómegimen hımııalyq óńdeý sharalary júrgizilip jatyr. Búgingi kúnge deıin 7 742 gektar aýmaq hımııalyq óńdeýden ótti. Al búginnen bastap merdiger tarapynan AN-2 áýe kóligi qosylyp, kúrdeli relefti óńirlerdi óńdeýge kiristi.
Basqa aýyldarmen qatar vıdeoda kórsetilgen Qaraqum eldi mekeninde 7 jer agregaty, 2 deltaplan jáne 23 RANS qondyrǵysy jumys istep jatyr.
Aýdan aýmaǵyndaǵy Aralqum, Sapaq, Jińishkequm, Bekbaýyl aýyldyq okrýgterine qarasty sharýa qojalyqtary men memlekettik jer qorlaryna da zııankesterden zalal kelgeni anyqtaldy. Osyǵan baılanysty Sapaq aýyldyq okrýginiń Kóktem eldi mekeninde ornalasqan sharýa qojalyqtaryna tıesili 157 gektar arnaıy tehnıkamen óńdelipti.
Qazir tıisti oryndar men merdiger mekemeler ókilderi shegirtke jaılaǵan aýmaqta júr.
