Naýqanǵa Mádenıet jáne aqparat mınıstrligi, Densaýlyq saqtaý, Oqý-aǵartý, Ǵylym jáne joǵary bilim mınıstrlikteri, Dúnıejúzilik densaýlyq saqtaý uıymy, IýNESKO, elimizdegi úkimettik emes uıymdar, jáne basqa da halyqaralyq uıymdar qoldaý kórsetti. Bes kún boıy elimizdiń barlyq óńirinde aqparattyq-aǵartý nasıhaty júrgizildi. Ár kún jekelegen taqyrypqa arnaldy. Onyń ishinde otbasyn josparlaýdan bastap, jasóspirimderge arnalǵan reprodýktıvti bilim berý, APV, JJBI aldyn alý jáne áıelder, erler densaýlyǵy máseleleri jeke-jeke kún tártibine shyǵaryldy.
Dóńgelek ústel barysynda aptalyqtyń qorytyndysy shyǵarylyp, reprodýktıvti densaýlyq salasyndaǵy memlekettik saıasatty jetildirýge arnalǵan usynystar aıtyldy. Bul – bolashaq urpaqtyń ál-aýqatyna tikeleı áser etetin mańyzdy baǵyt. Sebebi naýqanǵa qoldaý kórsetken seriktester salanyń damýyna serpin beretin usynystar aıtty. Ol materıaldar túgel jınaqtalyp, Ulttyq komıssııa otyrysynda usynylady.
Sonymen aptalyq barysynda 20 myńnan astam is-shara ótken. Oǵan 500 myń adam qatyssa, 240 myńnan astamy – jasóspirimder men jastar. Mamandar 80 myńǵa jýyq turǵynǵa tegin keńes bergen. 8,4 myńnan astam adam JJBI jáne AITV-ǵa test tapsyrdy. Áleýmettik jelilerde 359 myńnan astam jazba jarııalanyp, BAQ-ta 1,5 myńnan astam materıal shyqqan. Densaýlyq aptalyǵy qorytyndylanǵan jıynda Ulttyq komıssııa tóraǵasynyń orynbasary Juldyzaı Ysqaqova bastamaǵa úles qosqan barlyq seriktester men qatysýshylarǵa alǵys aıtty.
«Reprodýktıvti densaýlyqqa qamqorlyq mádenıetin qalyptastyrý – birrettik aksııa emes. Bul – strategııalyq mindet. Osyndaı bastamalar kúshimizdi biriktirýge, úzdik tájirıbelerdi keńinen engizýge jol ashady. Qoǵamdaǵy minez-qulyq pen kózqarasty ózgertýge septigin tıgizedi. Sondyqtan naýqanǵa úles qosqan barlyq seriktesterge alyǵys aıtamyz», – dedi J.Ysqaqova.
