Baǵdarlama memlekettik qyzmettiń tıimdiligin arttyrý maqsatynda jumys prosesterine jasandy ıntellekt quraldaryn engizýge jáne onyń múmkindikterin qoldanýǵa baǵyttalǵan.
Memleket basshysy Qasym-Jomart Toqaev azamattardyń jasandy ıntellekt salasyndaǵy biliktiligin arttyrý qajet ekenine nazar aýdaryp, bes jyl ishinde bir mıllıon adamdy jasandy ıntellekt daǵdylaryna úıretý mindetine erekshe kóńil bólý jáne oqýshylarǵa, stýdentterge, memlekettik qyzmetkerler men kásipkerlerge arnalǵan baǵdarlamaǵa barynsha qoldaý kórsetý qajettiligin atap kórsetken bolatyn.
«Prezıdent jasandy ıntellekt tehnologııalaryn jáne aýqymdy málimetter qoryn – Big Data-ny tıimdi paıdalaný, zamanaýı sıfrlyq tehnologııalar arqyly halyqpen etene baılanys ornatý joldaryn jaqsartý qajettiligin alǵa qoıdy. Agenttik memlekettik qyzmetshilerdiń sıfrlyq quzyretterin arttyrý boıynsha tıisti sharalar qabyldaýda. О́tkizilip jatqan oqytýlar memlekettik apparat qyzmetinde jańa tehnologııalardy tıimdi qoldanýǵa múmkindik beredi», - dedi Darhan Jazyqbaı.
Prezıdent janyndaǵy Memlekettik basqarý akademııasynda jáne onyń óńirlik fılıaldarynda ótetin oqytý baǵdarlamasy aıasynda tyńdaýshylar sıfrlyq saýattylyqty arttyrady. Jasandy ıntellekt quraldaryn tıimdi qoldaný arqyly derekterdi taldaý jáne ákimshilik prosesterdi avtomattandyrý, sondaı-aq sheshimder qabyldaý men ónimdilikti arttyrý baǵytynda bilimderin jetildiredi.
Oqytý memlekettik qyzmetshiniń kúndelikti qyzmetindegi josparlaý, aqparatty óńdeý, prezentasııalar jasaý syndy jumystarda jasandy ıntellekt múmkindikterin qoldaný daǵdylaryn qamtıdy. Kýrsta zamanaýı tildik modeldermen jumys isteýdiń ámbebap qaǵıdalary usynylady, bul túrli jasandy ıntellekt júıelerine ońaı beıimdelýge kómektesedi.
Sondaı-aq oqytý Snack Learning formaty boıynsha vıdeodárister túrinde de ótedi. Mundaı format memlekettik qyzmetshilerdiń jumys kestesine ońaı beıimdelip, oqý prosesin ıkemdi etedi. Baǵdarlama aıasynda osy jyly oqytýmen shamamen 30 myń memlekettik qyzmetshini qamtý josparlanyp otyr.
