Foto: ashyq derekkóz
«Temir» Taıson endi óziniń kelesi jekpe-jegin Qazaqstanda ótkizýi múmkin. Bul aqparatty «Alash praıd» promoýsheniniń prezıdenti Álimjan Bektaev taratyp otyr.
«Biz ústimizdegi jyldyń jeltoqsan aıynda asa aýyr salmaqtaǵy álemniń absolıýtti eks-chempıony, ataǵynan at úrketin Maık Taısondy bizdiń elge shaqyrtyp, keremet bir boks keshin uıymdastyrýdy kózdep otyrmyz. Qazir osy baǵytta jumystar júrgizilýde. Buıyrtsa, ol Reseıdiń maqtanyshy, aralas jekpe-jektiń has sheberi Fedor Emelıanenkomen aıqasady» deıdi Bektaev myrza.
Eger osy jospar júzege assa, Qazaqstannyń jankúıerleri attary ańyzǵa aınalǵan qos dúlúldiń aıqasyn tamashalap, osy jekpe-jekten jaqsy bir áser alatyny sózsiz. Sebebi, ekeýi de óz dáýiriniń teńdessiz tulǵalary. Máselen, Maık Taıson 1986 jyldyń 22 qarashasynda Trevor Berbıkti ekinshi raýnda uryp jyǵyp, álem chempıony atandy. Ol kezde Maık 20 jasta edi. Sóıtip, onyń esimi osyndaı dárejege jetken eń jas kásipqoı boksshy retinde tarıhta qaldy. 1985-1989 jylda aralyǵynda 37 ret rıngke shyqqan AQSh-tyń arlany barlyq básekede basymdyq tanytty. Taıson jalpy 59 kezdesýdiń 50-inde jeńiske jetti. 44 qarsylasyn nokaýtqa jiberdi. 7 márte utylyp, taǵy eki básekeniń nátıjesi esepke alynǵan joq.
Fedor Emelıankonyń da ataǵy alysqa jaıylǵan. Ol jaýyngerlik sambodan álemniń birneshe dúrkin chempıony, aralas jekpe-jekten «Praıdtyń» chempıondyq belbeýiniń ıegeri. 2001-2009 jyl aralyǵynda «Sońǵy ımperator» birde-bir aıqasta jeńilgen joq. Sol segiz jyl aralyǵynda 27 qarsylasyn sulatyp saldy. Barlyǵy 47 kezdesý ótkizgen Emelıanenko sonyń 40-yn óz paıdasyna sheshti. 31 básekede aıqyn basymdyq tanytty. Bul – óte keremet kórsetkish!
