Mysaly, sahna, oryndyq degender atymen joq. Bóbekter ata-analarymen birge jumsaq tekemettiń ústindegi kórpeshelerge jaıǵasyp, dál qasynda bolyp jatqan qyzyqty jaıttardy tamashalaıdy. Tipti, ertegi álemine enip, ondaǵy bolyp jatqan oqıǵalarǵa aralasyp, keıipkerlermen tildese alady.
Bas-aıaǵy jarty saǵattyq spektakl «Maımaq qonjyq» dep atalady. Ańǵal keıipker óziniń maımaqtyǵyna ókinedi. О́zin mazaq etken qoıan, tıin, shymshyq tárizdi dostaryna yzalanyp, «aıaǵymdy qalaı túzetip alsam eken» dep nalıdy. Alaıda anasynyń, eń bastysy, jańa dostary kishkentaı kórermenderdiń kómegimen jalpy aıý bitkenniń jaratylysy osylaı bolatynyn túsinip, kóńili kóteriledi. Qýanǵany sonsha, jańa dostaryna qýyrshaqtaryn úlestirip berip, bári birge qol ustasyp bıleı jóneledi.
Teatr dırektory Tólendi Álǵojanyń aıtýynsha, oblystyq qýyrshaq teatry kishkentaı kórermenderine bıyldan bastap qana qazaq tilindegi qoıylymdar usyna bastaǵan.
«Bıyl jalpy jeti spektakl josparlap otyrmyz. Onyń úsheýi qoıyldy. Búgin, mysaly, úshinshi spektaklimizdi usyndyq. Bul – Almatydan kelgen rejısserimiz Anar Berikqyzynyń týyndysy. Alty aılyq balasymen kelip jatqan ata-analar bar. Úsh-tórt jastaǵy balalar kóp kelip jatyr. Taǵy bir ereksheligi, spektaklge paıdalanatyn qýyrshaqtarymyz ben rekvızıtterimizdiń bári qoldan toqylǵan. Sýretshilerimiz ben kórkemdik jetekshimiz toqıdy. Ustaýǵa yńǵaıly ári jumsaq. Bul 5-6 aılyq balanyń akterler janynda eńbektep júrip jańaǵy jumsaq qýyrshaqtardy ustap, kórip, sezip, damýyna áser etedi. Mysaly, búgingi qoıylymda akterler taýyqtardyń qarny ashyp qaldy dep, ortaǵa balalardy shaqyryp, bári birlesip qustarǵa tary shashyp, tamaqtandyratyn sát bar. Nemese qonjyqty ara qýalaıtyn kezde qonjyq balalardyń arasyna jasyrynady. Baldyrǵandar oǵan kómektesip, aradan arashalap qalady. Balalar úshin kádimgideı qyzyq», deıdi teatr basshysy.
Jańa qoıylymdy tamashalaýǵa on shaqty ata-ana ǵana keldi. Ekiden jańa asqan Ámirdiń anasy Dıana Júnisqyzy mundaı spektaklderdiń jıi bolyp turǵanyn qalaıdy.
«Bala kútimimen otyrǵandyqtan, kóbine úıden shyqpaımyz. Búgin qýyrshaq teatryna kelip, ózim de, balam da boı sergitip, bir jasap qaldyq. Spektakl, ásirese, Ámirge qatty unady. Ártisterge qosylyp án aıtty, qonjyqpen birge júgirip bıledi. Balalar úshin qyzyq ári paıdaly qoıylym eken. Balamen qosa úıde otyrǵan analardyń bir aýyq demalyp ketýine de septigin tıgizedi», deıdi Dıana.
Qostanaı oblysy
