Ulttyq sport túrinen ótip jatqan jarysqa komandalar tyńǵylyqty daıyndyqpen kelgen. Jattyqtyrýshylar da týrnır boıy komandasyna dem berip, qoldaý kórsetýmen boldy. Al jarystyń túpki maqsaty – komandalar ishinen ádis-tásili kelisken kil myqtylardy irikteý edi. Alaıda, naqty irikteý qarasha aıyna qaldy.
– Biz arqan tartý sport túrin álemdik deńgeıde damytý maqsatynda respýblıkalyq týrnırler ótkizip jatyrmyz. Búgingi saıysqa erler, áıelder ǵana emes, birinshi ret jastar quramasy da qatysyp jatyr. Solardyń ishinen arqan tartýǵa ebi bar, bilek kúshi bar jastardy úlken jarystarǵa shyǵarýymyz kerek, – dedi arqan tartys federasııasynyń vıse prezıdenti Nurlan Jabaev.
Jarysqa qyzdar, erler, jasóspirimder jáne qyz-jigitter aralasqan tórt kategorııa boıynsha komandalar qatysty. Shyǵystyń shymyr qyzdary da alańǵa rýhtanyp shyǵyp, qarsylastaryn oısyrata utyp jatty.
Atalǵan jarystyń jalpy júlde qory 1,5 mln teńge. Degenmen, qatysýshylar júlde dep emes, árkim óz aımaǵynyń namysy úshin tartysqa tústi. Saıys qorytyndysy boıynsha aralas komandalyq jarysta óskemendikter Astanaǵa ese jiberip aldy. Al Shyǵystyń namysyn qorǵaǵan erlerdiń jáne áıelderdiń eki komandasy birinshi oryndy qanjyǵaǵa basty.
Jastar arasynda úzdik nátıje kórsetken sportshylar Ázerbaıjanda ótetin halyqaralyq «Turan» oıyndarynda arqan tartystan baq synasady.
Shyǵys Qazaqstan oblysy
