Foto: parlam.kz
Atalǵan zań jobasy astana men respýblıkalyq mańyzy bar qalalardyń áleýmettik-ekonomıkalyq damý máselelerin sheshýge baǵyttalǵan.
Áýeli B.Nájmetdınuly astanany jáne respýblıkalyq mańyzy bar qalalardy abattandyrý máseleleri boıynsha qoljetimdi ortany qamtamasyz etý, dızaın-kodty engizý jáne jergilikti ókildi jáne atqarýshy organdardyń quzyretterin naqtylaý normalardy jetildirý engizilgenin atap ótti.
«Zań jobasynda sondaı-aq jarnama qyzmetin retteý jáne qoǵamdyq oryndarda kóshedegi aýdıojarnamaǵa tyıym salý jáne de trotýarlarda, avtojoldarda syrtqy jarnamany ornalastyrýǵa tyıym salý kózdelgen. Jerdi qala muqtajy úshin paıdalaný normalaryn naqtylaý da usynylyp otyr», dedi ol.
Depýtattyń aıtýynsha, zań jobasynda nysanaly maqsaty boıynsha paıdalanylmaıtyn jer ýchaskesin májbúrlep alyp qoıý kezinde, burynǵy menshik ıesine ony satyp alý qunyn ǵana óteı otyryp, jerdi ótkizýden túsken tabysty bıýdjetke esepke jatqyzý usynylady.
«Zań jobasynda Jer kodeksine sáıkes jekelegen menshik ıelerine tıesili bola almaıtyn jer ýchaskelerine quqyqty qaıta resimdeý tártibin aıqyndaý jónindegi ýákiletti organnyń (Aýyl sharýashylyǵy mınıstrligi) quzyreti engiziledi», dedi B. Nájmetdınuly.
Depýtat sonymen qatar astanada kóshi-qondy retteý tetikterin jetildirý kózdelgenin, atalǵan zań jobasy bıyl 5 naýryzda birinshi oqylymda maquldanǵanyn atap ótti.
«Respýblıkalyq mańyzy bar qalalar men astananyń jergilikti ókildi jáne atqarýshy organdarynyń quzyretterin keńeıtýge baǵyttalǵan turǵynjaı renovasııalaý baǵdarlamasyn bekitý, aýmaqtardy abattandyrý, sondaı-aq saýda, medısınalyq, qonaq úı jáne ózge de qyzmetter kórsetý qaǵıdalaryn bekitý boıynsha túzetýler engizildi», dedi Májilismen.
Sondaı-aq depýtat qalalyq qoǵamdyq kólikte qoldanylatyn tarıftik saıasatty ázirleý boıynsha túzetýler Úkimettiń qorytyndysymen qoldaý tapqanyn málimdedi.
Sondaı-aq kóshi-qon salasyndaǵy normalardy odan ári jetildirý maqsatynda «ýaqytsha kóship kelýshini tirkeý» uǵymyn engizý, sondaı-aq ýákiletti organnyń quzyretterin naqtylaý usynylatynyn aıtty.
«El aýmaǵynda 30 kúnnen artyq bolatyn sheteldikterdiń baqylaýda bolýyn qamtamasyz etý jáne olardyń mekenjaı boıynsha turý qaǵıdalaryn saqtaýǵa baǵyttalǵan túzetýler Úkimettiń qorytyndysymen qoldaý tapty», dedi depýtat.
Buǵan qosa Memleket basshysynyń tapsyrmasyn sáıkes, energetıkalyq jáne kommýnaldyq sektorlardy jańǵyrtý ulttyq jobasyn iske asyrý sheńberinde jylý, elektr energetıkasy, sýmen jabdyqtaý jáne sý burýdyń úzdiksiz jumys isteýin qamtamasyz etý úshin birinshi kezektegi ınfraqurylymdyq problemalardy sheshýge baǵyttalǵan túzetýler engizilgen.
«Osy zań jobasy boıynsha Májilis komıtetteri oń qorytyndylar usyndy. Jumys tobynyń 19 otyrysy jáne Komıtettiń keńeıtilgen otyrystary ótkizildi. Zań jobasy boıynsha depýtattardan 463 túzetý tústi. Salystyrma keste 305 pozısııadan turady. Zań jobasy 54 zańnamalyq aktige, onyń ishinde 9 kodeks jáne 45 zańǵa ózgerister men tolyqtyrýlar engizýdi kózdeıdi», dedi baıandamashy.
Baıandamasynda osyndaı máselelerdi aıta kele Bolatbek Nájmetdınuly osy zańdy qabyldaýdy jáne ony Senatqa jiberýdi usyndy.
