Foto: Ticketon.kz skrınshoty
Satylym ashylǵan alǵashqy mınýttarda saıtqa kirýshiler sany kúrt ósip, júıe elektrondy kezek kútip turǵan adamdardyń sanyn kórsetti. Máselen, saıtqa kirý úshin kezekte 15 myńnan astam qoldanýshy tursa, naqty bılet satyp alyp jatqan adam sany nebári 35 bolǵan.
Ticketon paıdalanýshylarǵa betti jańartpaýdy jáne jappaýdy eskertti. Mundaı áreketter elektrondy kezekten avtomatty túrde shyǵaryp tastaıdy.
«Djennıfer Lopestiń konsertine bıletter tómendegi batyrma arqyly qoljetimdi. Nemese birneshe mınýt kútkennen keıin siz avtomatty túrde Ticketon-nyń basty betine ótesiz. Eger bul paraqshadan shyǵyp, 10 mınýt ishinde qaıta oralmasańyz, kezegińiz joıylady», delingen saıttaǵy habarlamada.
Bıletterdiń baǵasy 40 myń teńgeden bastalady (trıbýna), al VIP, FAN jáne DANCE-aımaqtarǵa kirý 90 myń teńgeden joǵary. Áleýmettik jeli qoldanýshylarynyń aıtýynsha, satylym bastalǵan alǵashqy saǵat ishinde eń tanymal oryndar lezde satylyp ketken.
Aıta keteıik, buǵan deıin «Astana Konsert» prodıýseri Málik Hasenov Astanadaǵy konsertke bıletterdiń satylymy 11 sáýirde bastalatynyn habarlaǵan. Ol kúni saıtqa kirý múmkin bolmaı, tehnıkalyq qıyndyqtar oryn alǵan edi.
Janel TО́LEÝBEKOVA, EUÝ stýdenti
