Foto: Aqorda
Prezıdenttiń aıtýynsha, búginde álemde turaqsyzdyq pen kereǵarlyq kúsheıip, syn-qaterler transulttyq sıpatqa ıe bolyp otyr. Alaıda, osyndaı ortaq qaterlerge jahandyq deńgeıde tıimdi, úılesimdi jaýap qatý áli de jolǵa qoıylmaǵan.
«Sózsiz, biz betpe-bet kelip otyrǵan syn-qaterler transulttyq sıpatqa ıe. Desek te oǵan qarsy áreketimizde birizdilik joq. Álemdegi ahýal óte shetin, turaqsyz ári kereǵarlyqqa toly. Sondyqtan jahandyq yntymaqtastyq úshin qurylǵan ınstıtýttar osy jaǵdaılarǵa saı bolýǵa tıis», dedi Prezıdent.
Memleket basshysy Qazaqstannyń orta derjavalar ádiletti ári ınklıýzıvti álemdik tártiptiń ornaýyna múddeli ekenin málimdedi. Ol qazirgi halyqaralyq júıeni muqııat saralap, tyń ádisterge súıený qajet ekenin, bul jolda orta derjavalar da jaýapkershilikti bólisýge daıyn bolýy tıis ekenin atap ótti.
«Jyl sońyna taman Nıý-Iorkte BUU-nyń 80 jyldyǵyn atap ótemiz. 1945 jyly, ıaǵnı, dúnıe júzindegi surapyl soǵystan keıin 51 memleket birge qurǵan bul Uıym beıbit ári qaýipsiz álemdi qurýdyń batyl jolyn usyndy. Búginde Uıymǵa 193 el múshe. Osylaısha, ol álemdegi quramy áralýan, kúrdeli ári ózara tyǵyz baılanysqan qoǵamdastyqqa aınaldy», dedi Memleket basshysy.
Biraq Memleket basshysy BUU qurylymyndaǵy basty tetik – Qaýipsizdik Keńesiniń osy ýaqytqa deıin ózgermegenin, bul uıymǵa degen senimge selkeý túsirip otyrǵanyn atap ótti.
«Áıtse de BUU-nyń negizgi tarmaqtary, ásirese, Qaýipsizdik Keńesi múldem ózgergen joq. 80 jyl buryn jasalǵan ınstıtýsıonaldy qurylym men qazirgi zaman arasynda alshaqtyq kóp. Bul Uıymǵa jáne onyń tıimdiligine degen senimge selkeý túsiredi. Mıllıardtaǵan adamnyń taǵdyryna áser etetin asa mańyzdy sheshimdi birneshe eldiń qabyldaǵany durys emes», dedi Qasym-Jomart Toqaev.
Osy oraıda Prezıdent Qazaqstannyń BUU Qaýipsizdik Keńesiniń quramyn keńeıtý jáne oǵan álemniń ártúrli óńirlerinen ókilder qosý qajettigi týraly ustanymdy qoldaıtynyn málimdedi. Onyń aıtýynsha, BUU ózektiligin joǵaltpaı, jańa zaman talabyna saı bolý úshin qurylymdyq reforma qajet.
«BUU ózektiligin joǵaltpaı, qazirgi zamannyń talaptaryna saı bolýy úshin Qaýipsizdik Keńesine qurylymdyq reforma jasalýǵa tıis. Alpaýyt elder beıbitshilik pen qaýipsizdikti saqtaýǵa beıil ekenin anyq bildirýi kerek. Ári barlyq memlekettiń terrıtorııalyq tutastyǵyn qorǵaý týraly eń basty qaǵıdattan aınymaýǵa tıis. Bárimiz BUU Jarǵysyn múltiksiz saqtaýymyz qajet. Onyń negizgi prınsıpterine ústirt nemese nemquraıly qaraýdan aýlaq bolýymyz kerek. Sonda ǵana Birikken Ulttar Uıymynyń abyroı-bedeline degen senimdi qalpyna keltire alamyz», dedi Memleket basshysy.
