«AlphaEvolve»-tyń basty ereksheligi – úlken tildik modelderdiń (LLM) shyǵarmashylyq qabileti men avtomatty baǵalaý algorıtmderin biriktirý arqyly úzdik sheshimderdi iriktep, jetildirip otyrýynda tur. Paıdalanýshy belgili bir esepti sheshý úshin bastapqy algorıtm men naqty baǵalaý sharttaryn engizgennen keıin, AlphaEvolve júıesi júzdegen, tipti myńdaǵan túrli sheshimderdi usynyp, olardyń ishinen eń tıimdisin tańdap alady. Osylaısha júıe ýaqyt óte kele birtindep eń úzdik ári tıimdi algorıtmder jıyntyǵyn qalyptastyrady.
Tehnologııa qazirdiń ózinde tájirıbede qoldanylyp úlgerdi. Máselen «AlphaEvolve» júıesi «Google» kompanııasynyń jasandy ıntellektige arnalǵan tenzorlyq óńdeý bloktarynyń (TPU) dızaınyn jetildirýge kómektesip, esepteýish resýrstardy 0,7 paıyzǵa únemdeýge múmkindik bergen. Sondaı-aq, ınnovasııalyq júıe matrısa kóbeıtýdiń burynnan tanymal, nemis matematıgi Folker Shtrassen 1969 jyly ashqan ádisinen jyldamyraq esepteıtin jańa algorıtm jasap shyqty. Bul esepteýler búginde neırondyq jelilerdi oqytýda keńinen qoldanylady. Sarapshylar «AlphaEvolve»-tyń basqa da belgili arnaıy maqsattaǵy algorıtmderden, mysaly, buryn usynylǵan «AlphaTensor»-dan asyp túskenin aıtyp otyr. Halyqaralyq ǵylymı qaýymdastyq ókilderi júıeni joǵary baǵalap, onyń ǵylymnyń kóptegen salasynda qoldanýǵa bolatynyn aıtady.
«DeepMind» ókilderi aldaǵy ýaqytta «AlphaEvolve» júıesin ǵylymı qoǵamdastyq úshin qoljetimdi etýdi josparlap otyrǵanyn málimdedi. Bul jasandy ıntellektiniń adamzat aldynda turǵan kúrdeli mindetterdi sheshýde mańyzdy serikteske aınalatynynyń taǵy bir dáleli bolmaq.
