Abaı oblysy Kásipkerler palatasynyń shaǵyn kásipkerlikti damytý bóliminiń basshysy Nurasyl Muratovtyń aıtýynsha, jobaǵa óńir kásipkerlerinen 29 ótinim túsken. Semeı qalasyn qosa eseptegende 40-tan astam keńes berý sharasy, 20-dan astam qatysýshy óz ónimderin usynǵan jármeńke uıymdastyrylǵan. Jobanyń mańyzdy kezeńderiniń biri – brendtik komıtet pen arnaıy komıssııanyń jumysy. Nátıjesinde, tórt kásipker jeńimpaz bolyp tanylǵan.
– Áleýmettik kásipkerlikti damytýǵa arnalǵan memlekettik granttar baıqaýynyń nátıjesinde eki qatysýshy – Raýshan Muqajanova men Gúlmıra Aıǵojına 5 mıllıon teńgeden grant ıegeri atandy. Qomaqty qarajat olardyń óndirisin keńeıtip, jańa naryqqa shyǵýyna múmkindik beredi. Byltyrǵy jeńimpazdar Nurzııa Táshimova men Aızere Amangeldıeva Kásipkerler palatasy arqyly ónimdi ilgeriletý, patentteý, marketpleısterge shyǵý, brend aıdentıka jasaýǵa qatysty arnaıy kýrstan ótti, – deıdi N.Muratov.
Grant ıegeri Gúlmıra Aıǵojına jobanyń artyqshylyqtary týraly aıta kelip:
– Biz óz ıdeıamyzdy naqty jumys isteıtin bızneske aınaldyrýǵa múmkindik aldyq. Jańa bilim men tehnologııalardy meńgerip, seriktester men jetkizýshilerdi tabý daǵdylaryn úırendik, sapaly ónim shyǵara bastadyq. О́nimdi ótkizýge, tabysty arttyrýǵa qol jetkizdik. Aldaǵy ýaqytta ónimimizdi brendke aınaldyryp, ony keńinen tanymal etkimiz keledi. Bul – óńirdegi jergilikti taýarlar men qyzmetterdiń óndirisin damytýǵa, tek jergilikti shıkizatty paıdalanatyn óndirýshiler birlestikterin qurýǵa baǵyttalǵan joba, – dedi.
Abaı oblysy
