Jasóspirimderge arnalǵan bul medıany Qalam komandasy júrgizip otyr. Qalam – Qazaqstan, Ortalyq Azııa, Túrki áleminiń tarıhy men mádenıeti týraly tanymal joba.
QalamBalam oqýshylar jıi paıdalanatyn TikTok jáne YouTube jelilerinde kontent usynady. Qazaq jáne orys tilderindegi vıdeolarda avtorlar ǵylymı dáldikpen, ázilmen qyzyqtyryp áketip, kúrdeli taqyryptardy jeńil tilmen baıandap beredi. Máselen, QalamBalam kontentinde qazirgi Qazaqstan jerinde bir kezderi ómir súrgen dınozavrlar, orta ǵasyrlardaǵy balalardyń ómiri, baıyrǵy dáýirdegi oıynshyqtar, saǵyz tarıhy, burynǵynyń adamdary oınaǵan doptar sekildi san túrli taqyryp bar.
Medıa jumysyndaǵy basty formattardyń biri – tarıh týraly vıdeo oqýlyq. Munda avtorlar kez kelgen taqyrypty 5 mınýt ishinde taldap, tarqatyp, túsindirip beredi. Vıdeo oqýlyq – mektep baǵdarlamasyn beıimdep usyný emes, jasóspirim aýdıtorııa úshin arnaıy ázirlengen tarıhı storıtellıngtiń jańa túri.
- Resmı derekterge sáıkes, Qazaqstanda 17 jasqa deıingi 6,8 mıllıon bala bar. Onyń ishinde 3 mıllıonnan astamy Alfa urpaǵyna kiredi. Búgingi kúni osy aýdıtorııa tez tabýǵa bolatyn qyzyqty bilimı kontentke qol jetkize almaı otyr. Biz osy jaǵdaıdy ózgertkimiz keledi. О́z mindetimizdi balalarǵa álemdi tanýǵa, túsinýge jáne suraq qoıýdan qoryqpaýǵa kómektesý dep bilemiz. Biz úırenshikti jolmen oqytpaımyz, biz oqýshynyń qyzyq aqparatty bilýge degen áýestigin oıatqymyz keledi, – deıdi QalamBalam komandasy.
Joba aıasynda ǵalymdardan, pedagogtardan, jýrnalısterden turatyn top jumys isteıdi. QalamBalam aımaqtaǵy balalar men jasóspirimderge arnalǵan eń iri bilim vıdeokitaphanasyn jınap, jas zertteýshiler qaýymdastyǵyn qalyptastyrýdy josparlap otyr.
Qalam – Qazaqstan, Ortalyq Azııa jáne Túrki áleminiń tarıhy men mádenıetine arnalǵan mýltımedıalyq joba. Jobada halyqaralyq zertteýshiler komandasy jumys isteıdi. Qalam-dy qazaq, orys jáne aǵylshyn tilderinde oqýǵa bolady.
Qalam Balam – Qalam komandasy ashqan, balalar men jasóspirimderge arnalǵan jańa sıfrlyq medıa.
