Mektepke deıingi ınklıýzıvti bilim men tárbıe ortalyǵynyń qurylysy 2026 jyly aıaqtalady dep josparlanǵan. Memlekettik satyp alý konkýrsynyń qorytyndysymen bas merdiger anyqtaldy. Jalpy aýmaǵy 20 172,73 sharshymetrdi quraıtyn balabaqsha ǵımaraty erekshe sáýlet jobasyna ıe. Eń ortasynda gúl pishindes ırektelgen ǵımaratty jan-jaǵynan eki qabatty bes blok qorshap tur. Qosymsha korpýstar ortalyqpen ótkelder arqyly baılanyssa, jobalaýshy merdiger bas ǵımarat ishine qysqy baq turǵyzatynyn da aıtady.
Ár ǵımarat densaýlyǵynda kinaraty bar balalardyń qajetine saı jabdyqtalady. Máselen, №1 blokta tirek-qımyl qozǵalysy buzylǵan, №2 blok kórý qabileti nashar, №3 blokta estý qabileti nashar jáne sóıleı almaıtyn balalar, №4-de oı-órisiniń damýy tejelgen búldirshinder ornalasady. Ortalyq ǵımaratynda dárigerlik blok, merekelik is-sharalar ótkizetin zal, basseın, ashana bar. Bir jaǵynan balabaqsha, ekinshi jaǵynan emdik-saýyqtyrý mekemesi retinde qurylatyn ortalyqty Eset batyr yqshamaýdanynyń turǵyndary kóp jyldan beri kútip júr. Sebebi, qalanyń osy bóliginde balabaqsha men mektepke baratyn balalar sany óte kóp ári oryn tapshylyǵy qatty seziledi.
Aqtóbe oblysy
