Mekeme 1200-den astam aýyl turǵynyna alǵashqy medısınalyq-sanıtarlyq kómek kórsetýge arnalǵan. Qurylysyna oblystyq bıýdjetten 220 mln teńge bólingen. Ǵımaratqa aýyzsý qubyry men káriz júıeleri tartylǵan. Nysannyń 15 bólmesi bar. Olardyń ishi feldsherlik-akýsherlik pýnktke qajetti qural-jabdyqtarmen tolyqtaı qamtamasyz etilgen. 270 sharshy metr aýmaqta ornalasqan nysan 15 adamǵa bir ýaqytta qyzmet kórsete alady.
«Analız tapsyrý úshin endi 55 shaqyrym qashyqtaǵy aýdan ortalyǵyna barýdyń qajeti joq. Qajet bolǵan jaǵdaıda qaladaǵy aýrýhanalarǵa joldama beriledi. Bul – partııanyń shalǵaı aýyldarǵa medısınalyq kómekti jaqyndatý baǵytyndaǵy júıeli jumysynyń nátıjesi», dedi «Amanat» partııasy Balqash aýdandyq fılıalynyń tóraǵasy Marat Noǵaıbaı.
Oblystyq densaýlyq saqtaý basqarmasy basshysynyń orynbasary Álimbek Tájikov bul tek bir aýylǵa arnalǵan joba emestigin atap aıtty. Mundaı medısınalyq mekemelerdi kóbeıtý arqyly óńirdiń barlyq shalǵaı eldi mekenderin dárigerlik kómekpen qamtý kózdelip otyr.
«Biz úshin ár azamattyń zamanaýı medısınalyq kómekke qol jetkizýi mańyzdy. Qazirgi ýaqytta aýyldyq jerlerde densaýlyq saqtaý nysandaryn salý, kúrdeli jóndeý jumystaryn júrgizý, kadrlarmen qamtamasyz etý jumystary qalypty júrgizilip keledi. Búgin ashylǵan feldsherlik-akýsherlik pýnkt osynyń dáleli. Jyl aıaǵyna deıin 30-dan astam medısınalyq mekeme qoldanysqa beriletin bolady», dedi Á.Tájikov.
«Amanat» partııasy aýylǵa kelgen jas mamandarǵa 10 mln teńge kóleminde járdemaqy berý bastamasyn kótergen edi. Sonyń nátıjesinde asa tapshy mamandyq ıelerine 8,5 mln teńge kóleminde bir rettik tólem berý qarastyrylyp otyr. Bul qoldaý tek belgili bir mamandyqtarǵa ǵana tıesili. Shart boıynsha dárigerler keminde 5 jyl aýylda jumys isteýge tıis.
«Amanat» partııasynyń saılaýaldy baǵdarlamasy aıasynda óńirde bıyl 15 dárigerlik ambýlatorııa, 12 feldsherlik-akýsherlik pýnkt, 11 medısınalyq pýnkt salý josparlanǵan.
Almaty oblysy,
Balqash aýdany
