Birinshiden, ekonomıkalyq nemese ınvestısııalyq jospar jasalǵanda, onyń eńbek naryǵyna qalaı áser etetinin mindetti túrde aldyn ala baǵalaý kerek. Ol úshin baǵalaý tetigin engizý qajet. Infraqurylymdyq jobalardan bastap saýda kelisimderine deıingi kez kelgen aýqymdy bastama qabyldanarda onyń laıyqty eńbekke tıgizer áseri jan-jaqty saralanýy tıis. Ekinshisi – jasandy ıntellekt jáne platformalyq jumyspen qamtý salasyna arnalǵan halyqaralyq eńbek standarttaryn ázirleý. Bul tek deklarasııa deńgeıinde qalmaı, №190 nemese №102 Konvensııalaryna uqsas tolyqqandy normatıvtik qujat bolýy kerek. Úshinshisi – kásipodaqtardyń transformasııasyn qoldaý. Ol úshin Halyqaralyq eńbek uıymynan Ortalyq Azııadaǵy kásipodaqtarǵa arnalǵan sıfrlandyrý jáne jańa sanattaǵy jumyskerlermen jumys isteýge baǵyttalǵan Aımaqtyq ınnovasııalyq ortalyqty Qazaqstanda qurý múmkindigin qarastyrý suralyp otyr.
Kásipodaqtar federasııasy medıa ortalyǵynyń habarlaýynsha, sessııanyń plenarlyq otyrysynda konferensııa qatysýshylary Halyqaralyq eńbek uıymynyń Bas dırektory Jılber Ýngbonyń baıandamasyn talqylady.
«Jumys oryndary, quqyqtar jáne ósim: ózara baılanysty nyǵaıtý» atty dástúrli jyl saıynǵy baıandamasynda HEU Bas dırektory jahandyq ózgerister men syn-qaterlerge baılanysty eńbek salasyndaǵy ózekti máselelerge: klımattyń ózgerýi, jańa tehnologııalardyń enýi, ekonomıkalyq turaqsyzdyq jaıyna toqtaldy. Bul máselelerdi tek áleýmettik áriptestiktiń barlyq taraptary – úkimet, jumysshylar men jumys berýshiler teń dárejede qatysatyn áleýmettik dıalog arqyly sheshýge bolady.
«Tez ózgerip jatqan ári belgisizdikke toly qazirgi kezeńde áleýmettik dıalog – ınklıýzıvti ekonomıkalyq ósimge, ádiletti eńbek jaǵdaılaryn qalyptastyrýǵa jáne jaýapty ınstıtýttar qurýǵa bastaıtyn eń tıimdi jol. Áleýmettik ádilettilikke jetý – árbir adamnyń jeke, ulttyq jáne jahandyq deńgeıdegi mindeti. Jahandyq turǵyda seriktestik demokratııalyq qundylyqtarǵa negizdelýi kerek», delingen HEU Bas dırektorynyń baıandamasynda.
