Jeńildikti shaǵyn nesıeler aýyl turǵyndaryna bıznes ashýǵa, jańa jumys oryndaryn ashýǵa ǵana emes, týǵan aýyldaryndaǵy ómirin jaqsartýǵa da múmkindik beredi.
Novoýzenka aýylyndaǵy fermer Qaırat Ábıev iri qara mal ósirýmen aınalysady, ol nesıe alyp, traktor satyp aldy.
Buryn, onyń aıtýynsha, jıi buzylatyn eski tehnıkamen jumys isteýge týra keletin.
– Jańa traktor «Mersedeske» uqsaıdy, – deıdi ol. – Onda jumys isteý jáne sharýashylyǵymdy basqarý ońaı: qar tazalaý, shóp pen kómir tasymaldaý jáne t. b.
Búginde Qaırat Ábıevtiń sharýa qojalyǵynda 140 bas iri qara mal bar. Fermer mal basyn kóbeıtýdi josparlap otyr.
«Aýyl amanaty» baǵdarlamasy boıynsha shaǵyn nesıeler bes jylǵa deıingi merzimge 2,5%-ben beriledi. Eń joǵarǵy soma – jeke kásipkerler úshin 9,8 mln teńge jáne kooperatıvter úshin 30 mln teńgege deıin. Kóbinese mal sharýashylyǵyn damytýǵa qarajat alady, biraq agrarıler de memlekettiń qoldaýyna ıe bolady.
Úshtóbe aýylynda eki kásipker Azamat Amantaıuly men Jasulan Smaǵulov aýyl sharýashylyǵy kooperatıvterin quryp, memlekettik qoldaýǵa ıe bolyp, jylyjaı salýda. Is aıaqtalýǵa jaqyn.
Olar kókónisterdi jyl boıy ósirip, logıstıkaǵa ketetin qosymsha shyǵyndarsyz qoljetimdi baǵamen satpaqshy.
– Jazda da, qysta da ónim jınaıtyn bolamyz, – deıdi Jasulan Smaǵulov. – Eger bári jaqsy bolsa, óndiristi keńeıtip, tropıkalyq jemistermen aınalysamyz.
Úshtóbe aýylynda shaǵyn sút zaýyty da óz jumysyn bastady. Ol jóndelgen ǵımaratta ashyldy, jabdyqtar «Damý» qorynyń qoldaýymen satyp alyndy.
Súzbe, maı jáne irimshik shyǵarady. Biraq assortımentti keńeıtý josparda bar.
– Ázirge sút jetispeıdi, – dep moıyndaıdy shaǵyn zaýyt tehnology Kenjebaı Bekmuratov. – Biraq Botaqara aýylynda sút qabyldaý pýnktiniń ashylýymen, sondaı-aq «Aýyl amanaty» baǵdarlamasynyń arqasynda jaǵdaı jaqsarýy tıis.
Baǵdarlama basqa da jobalardy iske asyrýǵa kómektesti – jartylaı fabrıkattar óndirý, týrızmdi damytý, jem-shóp shyǵarý.
«Aýyl amanaty» 2023 jyly iske qosyldy, onyń jumysy barysynda oblysta 5,6 mlrd teńgege 670-ten astam jeńildikti shaǵyn nesıe berildi. Buqar jyraý aýdanynda 128 joba júzege asyryldy. Eń belsendileri Botqara, Úshtóbe jáne Rostovka turǵyndary.
Buqar jyraý, Aqtoǵaı jáne Qarqaraly aýdandarynda aýyl sharýashylyǵy kooperasııasyn damytý «Bir aýyl – bir ónim» modeli boıynsha júrgizilýde.
Bıyl oblysta «Aýyl amanaty» baǵdarlamasy boıynsha 300-ge jýyq jobany qoldaý josparlanyp otyr.
