Chehııada shyǵarylǵan L-410 ushaǵy – eýropalyq «Aircraft Industries» kompanııasynyń kóp maqsatqa qoldanylatyn týrbovınttik áýe kemesi. Kabınasy Garmin-3000 avıonıka júıesimen jabdyqtalǵan. Mundaı júıe navıgasııalyq dáldikti arttyryp, ushýdy barynsha qaýipsiz etedi. Zamanaýı ushaq 19 adamdy nemese 2-3 tonnaǵa deıin júk tasymaldaı alady. Eń joǵary ushý jyldamdyǵy – saǵatyna 417 shaqyrym. Áýe kemesi 50°C-dan +50°C-ge deıingi ekstremaldy temperatýra jaǵdaıynda usha beredi.
Tótenshe jaǵdaılar mınıstri Shyńǵys Árinovtiń aıtýynsha, ushaq mınıstrlik quramyndaǵy avıasııalyq qyzmettiń jedeldigin arttyrady. Ekinshiden, tótenshe jaǵdaılarda jedel áreket etý múmkindigin keńeıtedi. «Ushaq bortynda zamanaýı zembilder, aýyr naýqastardy tasymaldaýǵa arnalǵan jabdyqtar, ushý kezinde syrqattardyń ómirin saqtaýdy qamtamasyz etetin qosymsha jabdyq ornatý múmkindigi bar», dedi mınıstr.
Munaıly óńirdiń tórt aýdanyndaǵy eldi mekenderde órt sóndirý deposy ashyldy. Qyzylqoǵa aýdanynyń Tasshaǵyl aýylyndaǵy jańa depo Kózdiǵara, Jambyl, Qyzylqoǵa aýyldyq okrýgterin órtten qorǵaý isin qamtamasyz etedi. Jańa nysannyń taǵy biri Maqat aýdanyndaǵy Dossor kentinde ornalasqan. Bul depo 40 shaqyrym radıýstaǵy 15 myńnan astam adamnyń qaýipsizdigin qamtyp, órt, ózge de tótenshe jaǵdaıǵa den qoıý ýaqytyn edáýir qysqartady.
Bókeıhan aýylynda iske qosylǵan jańa deponyń mańyzy tipti zor. О́ıtkeni bul aýyl Qurmanǵazy aýdanynyń Reseı Federasııasymen shekarasyndaǵy Qıǵash ózeniniń jaǵalaýynda ornalasqan. Sý aıdynynyń arǵy betinde Astrahan oblysynyń aýyldary bar.
«Memleket basshysynyń azamattyq qorǵaý júıesin nyǵaıtý, óńirlerdegi qaýipsizdik deńgeıin arttyrý jónindegi tapsyrmasyna sáıkes aýyldarda órt sóndirý deposy ashylyp jatyr. Maqsatymyz – kez kelgen tótenshe jaǵdaıǵa daıyn bolý, jedel áreket etý. Bólimsheler zamanaýı nysandarmen, jańa tehnıkalarmen qamtylatyn bolady. Bul tótenshe jaǵdaıdyń aldyn alýǵa, zardabyn tez joıýǵa yqpal etedi», dedi Sh.Árinov.
Atyraý oblysynyń ákimi Serik Shápkenov atap ótkendeı, shalǵaı aýyldardaǵy órt sóndirý depolary zaman talabyna saı jaraqtandyrylyp jatyr. Eldi mekenderdegi órtke qarsy ınfraqurylymdy nyǵaıtý jalǵasyn tabady.
«О́rt sóndirýshilerdiń alańsyz jumys isteýine tolyqqandy jaǵdaı jasaldy. Munyń bári tótenshe jaǵdaı kezinde shuǵyl áreket etýge, kásibı turǵyda shyńdalýǵa, azamattardyń qaýipsizdigin qamtamasyz etýge septigin tıgizedi. Sondaı-aq sala mamandarynyń áleýmettik jaǵdaıyn jaqsartýǵa da nazar aýdaryp otyrmyz», dedi S.Shápkenov.
О́rt sóndirý deposy jergilikti bıýdjet esebinen salynǵan. Qurylysyn merdiger mekeme – «Dekor» JShS júrgizgen. Jalpy aýmaǵy 480 sharshy metr nysan tez qurastyrylatyn joǵary sapaly modýldi konstrýksııalardan turǵyzylǵan. Ǵımaratta dıspetcherlik, demalys, as bólmeleri, oqý synyby, eki órt sóndirý tehnıkasyna arnalǵan jabyq turaq bar.
Tótenshe jaǵdaılar mınıstri Sh.Árinov jergilikti órt sóndirýshilerge 27 jańa tehnıkany saltanatty jaǵdaıda tapsyrdy. Onyń 22-si – túrli syıymdylyqtaǵy sısternasy bar órt sóndirý tehnıkasy. Sondaı-aq tótenshe jaǵdaılardyń saldaryn joıýǵa arnalǵan jabdyqtarmen qamtylǵan ASA-20 apattyq-qutqarý, baılanys jáne jaryqtandyrý, janarmaımen jabdyqtaıtyn, bıik ǵımarattardaǵy órtti sóndirýge arnalǵan mehanıkalyq saty ornatylǵan ASL-30, manıpýlıator-evakýator, AKP-70 VEMA avtokótergishi, ASO-20, Trackol Vega-409 tehnıkalary bar.
Atyraý oblysy
