Foto: Sý resýrstary jáne ırrıgasııa Mınıstrligi baspasóz qyzmeti
Atalǵan joba Tasótkel magıstraldy kanalynyń sońyndaǵy K1 jáne «Dalaqaınar» tarmaqtarynda iske asyryldy. Sý arnalaryndaǵy esepke alý men basqarý júıesin tolyq sıfrlandyrýdy kózdeıtin bul bastama «Qazsýshar» RMK Jambyl oblystyq fılıalynyń tikeleı baqylaýynda júzege asyrylyp otyr.
Joba aıasynda kanal boıyndaǵy sý kólemin naqty ári úzdiksiz baqylaýǵa múmkindik beretin zamanaýı jabdyqtar ornatylǵan. Endi dıspetcherlik ortalyq sýdyń naqty kólemi, taralý baǵyty men tehnıkalyq kúıi týraly derekterdi onlaın rejımde baqylap otyrady. Táýlik boıy jumys isteıtin eki beınebaqylaý kamerasy men qorǵanys júıesi de ınfraqurylym qaýipsizdigin arttyrýǵa sep bolmaq.
Avtomattandyrylǵan júıe sýdyń bosqa ysyrap bolýyna jol bermeı, onyń aýyl sharýashylyǵy maqsatynda ádiletti bólinýin qamtamasyz etedi. Ásirese, vegetasııalyq kezeńde sý tapshylyǵyn boldyrmaý úshin bul sheshimniń mańyzy zor. Sıfrlyq baqylaýdyń arqasynda artyq shyǵyn azaıyp, sý arnalaryn basqarý naqty esep pen monıtorıngke súıenip júzege asady.
Joba tek tehnıkalyq turǵydan ǵana emes, strategııalyq mańyzdylyǵymen de erekshelenedi. «Qazsýshar» fılıalynyń dırektory Qaırat Amanovtyń aıtýynsha, bul bastama ırrıgasııalyq ınfraqurylymdy jańǵyrtýdyń tıimdi úlgisine aınalýy múmkin.
«Jańa júıe sýdy esepke alýdy aıtarlyqtaı jeńildetedi. Iske asyrylyp jatqan pılottyq joba sý sektoryn sıfrlandyrýdyń taǵy bir qadamy. Ol ırrıgasııalyq ınfraqurylymdy jańǵyrtýdyń tıimdi úlgisi bola alady», – deıdi ol.
Qazirgi tańda elimizdiń birqatar óńirlerinde sý tapshylyǵy máselesi ótkir sezile bastady. Bul jaǵdaıda avtomattandyrylǵan basqarý júıeleri men naqty esepke negizdelgen modelder ǵana sýdy únemdeýdiń, agroónerkásip kesheniniń turaqty damýynyń kepili bolmaq. Shý aýdanyndaǵy joba – osy baǵyttaǵy alǵashqy ári senimdi qadam.
