Tagır 33 jasta. Ol Daǵystannyń Qazbek aýdanynda týdy. Ulty – avar. Bozbala shaǵynan jaýyngerlik sambomen shuǵyldanǵan Ulanbekovtiń álem chempıony degen ataǵy bar. Sodan keıin aralas jekpe-jekke den qoıdy. Ataǵy ańyzǵa aınalǵan bapker Abdýlmanap Nurmaǵomedovtyń qol astynda jattyǵyp, ataqty Habıb Nurmaǵomedov pen Islam Mahachev jáne taǵy basqa sańlaqtarmen bir zalda daıyndalady. Barlyǵy 19 ret oktagonǵa shyqqan Tagır sonyń 17-sinde jeńiske jetti. 10 básekede aıqyn basymdyq tanytty. 2020 jyldan beri UFC-de óner kórsetýde. Sol promoýshendegi alty kezdesýdiń beseýinde jeńiske jetti. Atap aıtsaq, brazılııalyq Brýno Sılva (upaı sanymen) pen Alan Nasımento (upaı sanymen), amerıkalyq Neıtı Mannıs (qylqyndyrý ádisimen), Kodı Derden (qylqyndyrý ádisimen) jáne Kleıton Karpenter (upaı sanymen) utyp, Tım Ellıotqa (upaı sanymen) ese jiberdi. Qazirgi kezde Ulanbekov óz salmaǵy boıynsha UFC reıtınginde 11 orynda tur.
Avar jigitiniń joly qazaqtarmen tórt márte qıysty. 2015 jyly Babaıýrtte Nurtilek Qonashevtyń qolyna aýyrtý tásilin qoldansa, 2016 jyly Dondaǵy Rostovta Shyńǵys Qaıranovty upaı sanymen eńserdi. 2017 jyly Mahachkalada Asý Almabaevty tehnıkalyq nokaýtpen utty. Al 2018 jyly Astanada Jalǵas Jumaǵulovtan jeńilip, AMC Fight Nights Global nusqasynyń chempıondyq ataǵynan aıyryldy. Sondaı-aq, 2019 jyly Ulanbekov Atyraýda ótken týrnırde Brazılııanyń faıteri Denıs Araýjodan aılasyn asyryp, «Gorilla Fighting Championship» promoýsheniniń altyn belbeýin jeńip aldy.
Azat Maqsum óz karerasyn qazaqtyń tól óneri – jekpe-jekten bastady. 2017 jyly tusaýkeser kezdesýin ótkizdi. 2023 jylǵa deıin 17 ret aıqas alańyna shyǵyp, barlyq básekede óz qarsylastarynan basym tústi. 12 aıqasty merziminen buryn aıaqtady. Birneshe promoýshenderdiń chempıony boldy. 2023 jyly UFC-men kelsimshartqa otyrdy. Sol maýsymda amerıkalyq Taıson Nemdi utty. Biraq byltyr AQSh-tyń taǵy bir ókili Charlz Djonsonnan oıda-joqta jeńilip qaldy.
