«2000-shy jyldardyń basynda Qazaq ulttyq agrarlyq zertteý ýnıversıtetinde memlekettiń jáne osy oqý ordasynyń menshigi talan-tarajǵa túsken. Atap aıtqanda, ýnıversıtettiń 3 jataqhanasy, 5 laboratorııalyq iri nysany jáne birqatar sharýashylyq maqsattaǵy jer ýchaskesi jeke adamdardyń qolyna ótip ketti. Munyń artynda sybaılas jemqorlyq áreketi turǵany anyq. Búginde «Amanat» partııasynyń atsalysýymen Bas prokýratýranyń jáne Sybaılas jemqorlyqqa qarsy is-qımyl agenttiginiń qyzmetkerleri osy máselemen aınalysyp jatyr. Árıne, osy jyldar aralyǵynda menshikter birneshe ret basqa tulǵalardyń qolyna ótip ketti. Osy ýaqytqa deıin birde-bir memlekettik organ naqty sheshim qabyldaǵan emes. Soǵan qaramastan, ádildik qalpyna kelýi kerek dep oılaımyn. Zańsyz jekeshelengen barlyq materıaldyq ıgilikter memleketke qaıtarylýy qajet. Buǵan jol bergen azamattar quqyqtyq jaýapkershilikke tartylýǵa tıis», dep atap ótti osy jaǵdaımen jiti tanys Májilis depýtaty Erlan Saırov.
Almaty qalasynyń prokýratýrasy ýnıversıtet múlkin zańsyz ıelikten shyǵarý faktilerin anyqtaǵan bolatyn. Naqty aıtqanda, Abaı dańǵyly 8 mekenjaıynda ornalasqan birqatar nysandar jekeshelenip ketken. Keıinnen «Irıda INVEST» JShS Abaı dańǵyly, 8 meken-jaıynda ornalasqan jer ýchaskesiniń bir bóligin «RAMS-Qazaqstan» JShS-ne kóp páterli turǵyn úı salýǵa bergen. Qazirgi ýaqytta kóp páterli turǵyn úı salý úshin bastalǵan qurylys jumystary ýaqytsha toqtatyldy.
Osy másele boıynsha Bas prokýrorǵa jáne Premer-mınıstrge málimdeme joldanǵanyn atap ótken depýtat Erlan Saırov bul nysandardyń stýdentterdiń ıgiligine qaıtarylýy qajettigin alǵa tartty.
Sońǵy eki jylda Qazaq ulttyq agrarlyq zertteý ýnıversıtetiniń aktıvterin memleket menshigine qaıtarý baǵytynda qarqyndy jumys júrgizilip jatyr. Mysaly, jeke qolǵa ótken №6 stýdenttik jataqhana oqý ordasynyń turǵyn úı qoryna qaıtarylyp, kúrdeli jóndeýden keıin qosymsha 280 stýdent orynmen qamtamasyz etildi.
Almaty oblysy, Talǵar aýdany, «Baıbulaq» aýylyndaǵy «Agroýnıversıtet» oqý-tájirıbelik sharýashylyǵyndaǵy 50 oryndyq jataqhana (jer kólemi 1,345 ga), aýyl sharýashylyq tájirıbelik maqsatyndaǵy 0,11 ga jer ýchaskesi (janarmaı stansııasy salynyp ketken), aýyl sharýashylyq zattaryn saqtaıtyn qoıma (jer kólemi 0,0455 ga), tehnıkalyq quraldarǵa arnalǵan garaj (jer kólemi 0,08 ga) ýnıversıtet mengishigine qaıtaryldy. 1973 jyly salynǵan, sońǵy 30 jyl boıy birde-bir ret jóndeý kórmegen oqý-tájirıbelik sharýashylyqtyń jataqhanasy jaqynda kúrdeli jóndeýden ótkizilip, stýdentterdiń paıdalanýyna berildi.
«AMANAT» partııasy ótkizgen jıynda ýnıversıtettiń qaýipsizdigine qater tóndiretin jaǵdaılardy eskere otyryp, stýdentter men oqytýshylar tarapynan osy nysandardy salýdy múlde toqtatý jáne túbegeıli oqý ordasynyń ıeligine qaıtarý baǵytyndaǵy talaptar nazarǵa alyndy.
О́z kezeginde, keńeske qatysqan QR О́nerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıteti tóraǵasy orynbasarynyń mindetin atqarýshy Serik Nabıev, Almaty qalasy ákiminiń orynbasary Beıbit Shahanov, «Amanat» partııasy Ortalyq apparaty partııalyq baqylaý departamentiniń ınspektory Venera Esilbaeva, partııanyń Almaty qalalyq fılıalynyń tóraǵasy Stanıslav Kankýrov, «Amanat» partııasy AQF Sybaılas jemqorlyqqa qarsy keńesiniń múshesi Nurlan Sısekenov, Almaty qalasy qurylysyn baqylaý basqarmasynyń basshysy Danııar Qyryqbaev, Almaty q. qalalyq josparlaý jáne ýrbanıstıka basqarmasynyń basshysy Nurlan Boranbaev, Almaty qalasy jer qatynastary basqarmasynyń basshysynyń orynbasary Tımýr Tursbekov óz usynystarymen bólisti. Olar depýtattyń bastamasyn qoldaı otyryp, jeke qolǵa zańsyz ótip ketken ýnıversıtet nysandaryna jan-jaqty tekserý júrgizýdi, zańsyz qurylysty toqtatý sharalaryn jýyq arada júrgizýdi qolǵa alatyndaryn jetkizdi.
Qazirgi tańda bul ózekti másele «Amanat» partııasynyń, Bas prokýratýra jáne Sybaılas jemqorlyqqa qarsy is-qımyl agenttiginiń baqylaýynda tur.
Almaty
