Foto: Mádenıet jáne aqparat mınıstrligi
Ujymnyń 90 jyldyq mereıtoıyna oraılastyrylǵan konsert Aqmola oblysynan bastalyp, elordada jalǵasyn tapqan gastroldik saparynyń bir bóligi boldy.
Eki bólimnen turatyn konserttiń alǵashqy bóliminde dástúrli kúıshi-kompozıtorlardyń týyndylary usynyldy. Atap aıtsaq, Qurmanǵazy, Dáýletkereı, Táttimbet, Nurǵısa Tilendıev, Qarshyǵa Ahmedııarov jáne taǵy da basqa kompozıtorlardyń shyǵarmalary oryndaldy. Bul bólimde ulttyq mýzyka mádenıetiniń tereńdigi men baılyǵy, tarıhı mańyzy kórsetildi.
Zamanaýı baǵyttaǵy shyǵarmalar men álemdik klassıkany qamtyǵan ekinshi bólimde Yanni, Sting, Toni Braxton, Ray Charles, Whitney Houston syndy óner juldyzdarynyń shyǵarmalary sahna tórinde qalyqtady.
Qazaq orkestrine laıyqtalǵan bul týyndylar ulttyq dástúr men qazirgi zamannyń úılesimdi úndestigin kórsetti. Keshte Qazaqstannyń eńbek sińirgen qaıratkerleri, halyqaralyq baıqaýlardyń laýreattary jáne Ahmet Jubanov atyndaǵy daryndy balalarǵa arnalǵan mektep ınternatynyń vıolonchelıster ansambli óner kórsetti.
Aıta keteıik, ujymnyń kelesi gastroldik sapary Shymkent qalasynda jalǵasady. Ujym Respýblıkalyq «Orkestrler sherýi» festıvaline qatysyp, shymkenttik kórermenge «Orkestr túni» atty avtorlyq jobasyn usynady.
