Merekelik is-sharaǵa arnaıy qatysqan Densaýlyq saqtaý mınıstriniń orynbasary Tımýr Muratov quttyqtaý sózinde: "Medısına tek mamandyq emes, bul kásip. Búgingi tańda medısına qyzmetkerleriniń kásibıliginiń arqasynda kún saıyn myńdaǵan adamnyń ómiri saqtalýda. Biz barlyq aq halatty abzal jandarǵa adaldyqtary, shydamdylyqtary jáne aqyl-oıdan quralǵan kúshteri úshin alǵys aıtamyz",-dedi.
Oblys ákiminiń birinshi orynbasary Nurlan Ábdirahym medısına óńirlik saıasattyń basymdyqtarynyń biri ekenin atap ótti jáne bıyl 239 tehnıka men 15 sanıtarlyq mashına satyp alýǵa 3,4 mlrd teńge bólingenin jetkizdi. Qazirdiń ózinde aýyldarda 17 jańa medısınalyq nysan iske qosylyp, taǵy 21-i salynýda. Munyń barlyǵy dárigerlerdiń zamanaýı jaǵdaıda jumys isteýi jáne pasıentterdiń úıge jaqyn jerde sapaly kómek alýy úshin jasalyp jatqandyǵyn jetkizdi.
Is-shara barysynda qatysýshylar otandyq medısınalyq tehnıka jáne farmasevtıka kórmesine qatysty. Mádenıet úıinde saltanatty qabyldaý ótkizip, onda úzdik dárigerlerge marapattar tabystady. Is-sharanyń kýágerleri bolǵan kórermender, shyǵarmashylyq uıymdardyń áserli konsertin tamashalady.
Esik qalasyna barǵan delegasııa, jańartylǵan Eńbekshiqazaq aýdandyq aýrýhanasymen tanysty. Munda kúrdeli jóndeýden keıin mekeme halyqaralyq standarttarǵa sáıkes keletin zamanaýı jabdyqtar alyp, qarqyndy terapııa bólimshelerin ashty.
Bul ózgeristerdiń kúndelikti jumysta qalaı seziletini týraly jalpy tájirıbeli dárigeri Sabırova Aınur Nurıdınqyzy aıtyp berdi. Dárigerdiń sózinshe, sońǵy jyldary aýrýhanada ýltradybystyq apparattar, jańa avtokólikter, yńǵaıly jumys jaǵdaılary jasalýda. Turǵyndardyń ózderi: "Qazir bizdiń aýrýhana qalalardaǵy aýrýhanadan kem emes",-deıdi. Bunyń barlyǵy jaqsy sebeppen jasalatyn úlken jumystyń nátıjesi ekendigin alǵa tartty.
Almaty oblysynda 3 myńǵa jýyq dáriger men myńdaǵan orta býyn qyzmetkerleri jumys isteıdi. Olardyń jumysy mártebeli ári taptyrmas bolyp qala beretindigi sózsiz.
