Bekitilgen kún tártibine sáıkes, senatorlar aldaǵy beısenbide «Qazaqstan Respýblıkasy Konstıtýsııasynyń otyz jyldyǵyna baılanysty raqymshylyq jasaý týraly» zańdy qaraıdy. Zańnyń basty maqsaty – qylmystyq-quqyqtyq sıpattaǵy birjolǵy adamgershilik aktisin júrgizý. Bul rette azamattar men memlekettiń qaýipsizdigine eleýli qater tóndirmeıtin qylmys jasaǵandardy ǵana qylmystyq jaýaptylyqtan nemese negizgi jazadan bosatý týraly sóz bolyp otyrǵanyn atap ótken jón. Sondaı-aq sottalǵandarǵa, onyń ishinde probasııalyq baqylaýdaǵylarǵa qatysty jazalaýdyń ótelmegen bóligin qysqartý kózdelgen.
Sonymen qatar palata otyrysynda «Qazaqstan Respýblıkasy keıbir zańnamalyq aktilerine quqyq qorǵaý qyzmetin jetildirý, quqyq qorǵaý organdarynyń, arnaýly memlekettik organdardyń, azamattyq qorǵaý organdarynyń qyzmetkerlerin jáne áskerı qyzmetshilerdi turǵyn úımen qamtamasyz etý jáne áleýmettik qorǵaý, sondaı-aq ishki ister organdarynyń qyzmeti salasynda artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zań qaralady. Qujat aýqymdy máselelerdi qamtıdy. Sol arqyly zańdardy artyq normalardan bosatý jáne zańǵa táýeldi aktiler deńgeıinde elde týyndaıtyn ózgeristerge olardyń normatıvtik retteý bóliginde jedel den qoıý kózdelip otyr. Atap aıtqanda, esirtki quraldarynyń zańsyz aınalymy men teris paıdalanylýyna qarsy is-qımyl, quqyq qorǵaý organdarynyń qyzmetkerlerin, áskerı qyzmetshilerdi áleýmettik qoldaý jónindegi sharalardy kúsheıtý tetikteri jáne basqa da jańa normalar qarastyrylǵan.
Depýtattar bastamashy bolǵan «Qazaqstan Respýblıkasy keıbir zańnamalyq aktilerine orman sharýashylyǵy, erekshe qorǵalatyn tabıǵı aýmaqtar jáne jeke kásipkerlik sýbektileriniń mindettemelerine kepildik berý máseleleri boıynsha ózgerister men tolyqtyrýlar engizý týraly» zań da Senat otyrysynyń kún tártibine shyǵaryldy. Bul zań erekshe qorǵalatyn tabıǵı aýmaqtar salasyndaǵy zańnamany jetildirýge jáne quqyqtyq retteýdegi olqylyqtardy joıýǵa baǵyttalǵan. Atalǵan qujat arqyly orman qory men aıryqsha qorǵalatyn tabıǵı aýmaqtarda ol jerlerge erekshe mártebe berilgenge deıin de bolǵan áleýmettik jáne strategııalyq nysandar men ınfraqurylymdardyń qyzmetine qatysty problemalardy sheshý kózdelgen.
Sondaı-aq depýtattar Qazaqstan Respýblıkasy Úkimetiniń jáne Qazaqstan Respýblıkasy Joǵary aýdıtorlyq palatasynyń 2024 jylǵy respýblıkalyq bıýdjettiń atqarylýy týraly esepterin qarap, aldaǵy birlesken jumystyń mańyzdy mindetterin aıqyndaıdy.
Is-shara barysynda bıýro músheleri Parlament Májilisinen kelip túsken zańdardy jumys úshin Senat komıtetterine bólip berdi.
