«Alan týraly ańyz» kórermenge jol tartady

Mádenıet jáne aqparat mı­nıstrli­giniń tapsyrysymen túsirilgen fılm jelisinde Alan esimdi aq barystyń bas­tan keshken shytyrman oqıǵalary baıandalady. Keıipkerdiń erligi men qaısarlyǵy týǵan jerge degen súıis­penshiligi arqyly ulttyq qundylyqtar keńinen nasıhattalady. Fılmniń rejısseri – Azamat Ernazarov. Ssenarııin Baqytjan Quljabaev, Batyrhan Dáýrenbekov, Azamat Ernazarov jazǵan. «Barys – Alma­tynyń rámizi. Oqı­ǵada Alan esimdi aq barys ózi­niń týǵan qalasyn qorǵap, erlik kórse­tedi. Alannyń dostary týraly da kórsetemiz», deıdi Batyrhan Dáýrenbekov.

Fılmniń rejısseri Azamat Ernazarovtyń aıtýynsha, oqıǵa dınamıkasy, tartysty sátter men áserli kórinister jas kórermendi ǵana emes, eresekterdi de beıjaı qaldyrmaıdy. Týyndy ulttyq rýhty, tarıhı-mádenı elementterdi zamanaýı 3D anımasııamen úılestire otyryp, qazaqy bolmysty jańa formatta tanytýdy maqsat etedi. «Bul fılm álemdik deńgeıde jasalǵan. Týyndyny jasaýǵa eki jyl ýaqyt ketti. Joba otandyq anımasııa ındýstrııasynyń damýyna serpin berip, ulttyq mazmundaǵy sapaly dúnıelerdiń kóbeıýine yqpal etedi, kórermenge sapaly dúnıe usynamyz dep oılaımyn», deıdi «Saq» kınostýdııasynyń dırektory Nýrıddın Patteev. Kórsetilim jýyq arada elimizdiń barlyq kıno­teatrlarynda kór­setiledi. Sondaı-aq ta­ǵylymy tereń týyndy aldaǵy ýaqytta sheteldik aýdıtorııaǵa da jol tartady. Iаǵnı anımasııalyq fılmdi Túrkııa elinde kórsetý jos­parlanyp otyr.