Senat spıkeri tyńdaýshylardy jańa kýrstyń bastalýymen quttyqtap, eki aptalyq oqý kezeńi palatanyń turaqty sarapshylar qaýymdastyǵyn qalyptastyrý baǵytyndaǵy naqty jumystyń jalǵasy ekenin aıtty. Sondaı-aq ol ár saladaǵy sarapshylardyń óz bilimimen bólisýge, tájirıbe almasýǵa, sol arqyly qundylyqtardyń durys júıesin dáripteýge daıyn bolýy jáne osy joldaǵy belsendiligi erekshe mańyzǵa ıe ekenin atap ótti. Memleket basshysynyń «Adal azamat» tujyrymdamasy osyndaı qaǵıdatqa taban tireıdi.
«Álemdegi jetekshi ýnıversıtetterdiń biri – Garvardtyń túlekteri óz bilimderimen bólisip, ashyqtyq pen jaýapkershilik qundylyqtaryn dáripteıtin osyndaı bastamalardyń mańyzy zor. Bul qundylyqtar Prezıdent Qasym-Jomart Toqaev jarııalaǵan «Adal azamat» tujyrymdamasynyń da negizi ekenin atap ótken jón. Sarapshylar klýby jáne Taldaý mektebi, jalpy Taldau Community sııaqty jobalardyń ózegi osyndaı baǵdarlarǵa taban tireıdi. Bizdiń basty maqsatymyz – bilim berý ǵana emes, sonymen qatar tájirıbe almasatyn, tyń oılar men ıdeıalarǵa jol ashatyn jáne qoǵamdaǵy oń ózgeristerge yqpal etetin ıntellektýaldy qaýymdastyq qalyptastyrý», dep M.Áshimbaev mańyzdy bastama úshin Harvard Alumni Community ókilderine alǵys bildirdi.
Senat janyndaǵy Taldaý mektebi men Sarapshylar klýby aıasyndaǵy oqytý kezeńderi sııaqty «Kelissózder júrgizý sheberligi: túsiný, yqpal etý, kelisý» kýrsy da teorııa men praktıkanyń kollaborasııasy ekenin aıta ketken jón. Eki apta ishinde tyńdaýshylar álemdegi eń tıimdi tásilderdiń biri sanalatyn Garvard kelissózder mektebiniń ádistemesimen strategııalyq josparlaý, menedjment jáne ártúrli kommýnıkasııa úlgilerin qurý daǵdylary boıynsha bilimderin jetildiredi. Sondaı-aq olar tıimdi jaǵdaılarmen tanysyp, taldaýlar júrgizedi jáne analıtıkalyq jumys týraly túsinikterin keńeıtedi.
