Joba boıynsha Ulttyq qordyń ınvestısııalyq kirisiniń 50%-y jylyna bir ret 2006 jyly jáne odan keıin týǵan, Qazaqstan Respýblıkasynyń azamaty bolyp esepteletin balalar arasynda bólinedi. 2024 jyldan beri elimizde týǵan árbir balaǵa Ulttyq qordan arnaıy shot ashylyp, jyl saıyn onyń atyna qarajat aýdaryla bastady. Qarjy 18 jasqa tolǵanda oqýǵa nemese turǵyn úıge paıdalanýǵa beriledi.
2025 jylǵy 1 maýsymdaǵy jaǵdaı boıynsha 2024 jyldyń 1 aqpanynan bastap «Biryńǵaı jınaqtaýshy zeınetaqy qory» AQ 13,34 mln AQSh dollaryna 108 694 ótinish oryndap, ótinish berýshilerdiń banktik shottaryna aýdarý úshin ýákiletti operatorlarǵa joldady. Onyń ishinde turǵyn úı jaǵdaılaryn jaqsartý maqsatynda 7,95 mln AQSh dollaryna 64 325 ótinish, bilim alý aqysyn tóleý úshin 5,38 mln AQSh dollaryna 44 369 ótinish oryndaldy. Esterińizge sala keteıik, nysanaly jınaqtardy alýshy barlyq somany nemese onyń bir bóligin paıdalanýǵa quqyly, aqshanyń paıdalanylmaǵan qaldyǵy nysanaly jınaqtaý shotynda qala beredi.
Turǵyn úı jaǵdaılaryn jaqsartý aıasynda jastar qarjylaryn kóbine: odan ári jınaqtaý úshin turǵyn úı qurylysy jınaqtaryndaǵy salymdy tolyqtyrý (7,77 mln AQSh dollaryna 62 749 ótinish oryndaldy), turǵyn úı satyp alýǵa ıpotekalyq turǵyn úı qaryzyn alý úshin bastapqy jarnany engizý (57,78 myń AQSh dollaryna 496 ótinish), azamattyq-quqyqtyq mámileler boıynsha menshikke turǵyn úı satyp alý (44,69 myń AQSh dollaryna 407 ótinish) maqsatynda paıdalandy.
Bilim alý aqysyn tóleý jónindegi eń tanymal maqsattar: el aýmaǵynda ornalasqan bilim uıymdarynyń bilim berý qyzmetterine úlestermen (árbir akademııalyq kezeń nemese oqý jyly úshin) nemese bir ret tolyq kólemde (búkil oqý merzimi úshin) aqy tóleý (4,79 mln AQSh dollaryna 39 065 ótinish), bilim alý úshin jınaqtaý salymy týraly shart boıynsha bilim alý jınaqtaý salymyn tolyqtyrý (437,15 myń AQSh dollaryna 3 935 ótinish), sheteldik bilim berý uıymdarynyń oqytý qyzmetterine úlestermen (árbir akademııalyq kezeń nemese oqý jyly úshin) nemese tolyq kólemde birjolǵy (búkil oqý merzimi úshin) aqy tóleý (122,91 myń AQSh dollaryna 1 113 ótinish oryndaldy) boldy.
«BJZQ» AQ málim etkendeı, 2023 jyly barlyq nysanaly jınaq salymshylaryna 100,52 AQSh dollary, 2024 jyly 129,38 AQSh dollary eseptelgen. 2006 jyly týǵan azamattardy qospaǵanda, 2023 jyly Ulttyq qordan alǵashqy qarajat eseptelgen balalarǵa bıylǵy jyly 3,04 AQSh dollary mólsherinde ınvestısııalyq kiris jazylǵan. Nátıjesinde, 2006 jyly týǵan balanyń nysanaly jınaǵy 100,52 AQSh dollaryna teń bolsa, 2007 jyly týǵan balanyń nysanaly jınaqtaý shotynda 232,94 AQSh dollary jınaqtaldy.
Kámeletke tolǵan azamattar ózderiniń nysanaly jınaq týraly aqparatty BJZQ-nyń nemese elektrondyq úkimettiń ınternet-resýrstaryndaǵy jeke kabıneti arqyly óz betinshe alýǵa tıis, sodan keıin ýákiletti operatorǵa AQSh dollarynda banktik shot ashyp, turǵyn úı jaǵdaılaryn jaqsartý nemese bilim alý aqysyn tóleýge nysanaly jınaq tólemine onlaın-ótinish berý úshin júgine alady.
«Ulttyq qor – balalarǵa» – bolashaqqa jasalǵan qamqorlyq, ekonomıkalyq ádilettilik pen urpaq sabaqtastyǵynyń naqty kórinisi. Baǵdarlama arqyly ár bala el baılyǵynan úles alyp, baıypty bilim alýǵa nemese jeke ómirge qadam basýǵa materıaldyq negiz qalyptastyrady, óz isin bastaýǵa nemese joǵary oqý ornyn tańdaýǵa múmkindik alady. Bolashaq býyndy qarjylyq qoldaý – adamı kapıtaldy damytý, saýatty, áleýeti joǵary urpaq tárbıeleýdiń tetigi. Jas qaýym erte jastan jeke qarjysyn basqarýǵa úırenip, jınaq jasaý men durys jumsaý daǵdylaryn meńgeredi.
