Aýdandaǵy 4 095 gektar baqtyń 3 100 gektary órik baýlaryna tıesili. Jyl saıyn munda 22 myń tonnaǵa deıin ónim jınalyp, onyń 4 myń tonnasy Reseı, Qyrǵyzstan jáne О́zbekstan naryǵyna eksporttalady. Qalǵan bóligi ishki naryqta suranysqa ıe. Búginde óriktiń bir kılosy 250–300 teńge aralyǵynda satylyp jatyr.
«Apricot Fest» – ekotýrızm men óńirlik ekonomıkany damytýdyń tamasha bastamasy. Bul – tabıǵat pen mádenıetti, jergilikti ónim men biregeılikti toǵystyratyn alań. Bastapqy kezeńnen-aq joba sheteldik kásipkerlerdiń qyzyǵýshylyǵyn arttyryp otyr. Qyrǵyzstan men О́zbekstan kompanııalary festıval aıasynda ónim jetkizý boıynsha kelisimder jasady», deıdi saltanatty jıynda sóz alǵan Almaty oblystyq máslıhatynyń tóraǵasy Qýat Baıǵodjaev.
Uıǵyr aýdanynyń ákimi Bota Eleýsizova óriktiń óńir úshin erekshe rámizdik máni bar ekenin atap ótti.
«О́rik – bizdiń aýdannyń tek aýyl sharýashylyǵy ónimi emes, ekonomıkamyzdyń, mádenıetimizdiń de belgisi. «Apricot Fest» festıvalin jyl saıyn dástúrge aınaldyryp, óńirge keletin týrıster aǵynyn arttyrǵymyz keledi», dedi ol.
Festıval aıasynda túrli gastronomııalyq aımaqtar, jergilikti ónimder jármeńkesi, etno-shoýlar men sheberlik synyptary uıymdastyryldy.
«Aýyl jandandy. Kópten kútken qozǵalys, jańǵyrý bastaldy. Kelýshiler qyzyǵýshylyqpen tamashalap, ónimniń dámin kórip jatyr. Bizge dál osyndaı sharalar qajet edi», deıdi turǵyn Ravıl Anadýllaev. Festıvalǵa alys-jaqynnan aǵylǵan meımandar az bolmady. Olar óz kezeginde este qalarlyq sharaǵa rızashylyǵyn bildirip, sary órikten kóptep satyp alǵandaryn da qýana aıtyp
jatty.
Oblystyq týrızm basqarmasynyń basshysy Qýanyshbek Mırambekulynyń aıtýynsha, keler jyldan bastap «Apricot Fest» festıvalin sáýir aıynda, órik baýlary gúldenetin kezeńde ótkizý josparlanyp otyr. «О́rik gúldegende baýlar kózdiń jaýyn alady. Biz sáýirdegi festıvalda týrıster aǵyny odan saıyn kóbeıedi dep senemiz», deıdi Qýanyshbek Mırambekuly.
Alǵashqy «Apricot Fest» festıvali tek ónim merekesi ǵana emes, ári jańa týrıstik jáne ınvestısııalyq baǵyt qalyptastyrýdyń bastaýyna aınaldy. О́z kezeginde órik te eksporttyq ónim ǵana emes, óńir rámizine, qonaqjaılylyq pen múmkindikter kórsetkishine aınalary anyq.
Almaty oblysy
