Evakýasııa óńirdiń dostas memleketteriniń aýmaqtary arqyly tranzıtpen júzege asyryldy. Atap aıtqanda, 89 adam Irannan Túrikmenstan arqyly jáne 20 adam Ázerbaıjan arqyly ótti. Barlyq azamatqa konsýldyq-quqyqtyq kómek kórsetildi jáne Otanǵa oralý úshin qajetti jaǵdaı jasaldy.
Syrtqy ister mınıstrligi Iran, Túrikmenstan jáne Ázerbaıjan bıligine otandastarymyz búkil baǵyty boıynsha qaýipsiz jáne ýaqtyly ótýin qamtamasyz etýde mańyzdy ról atqarǵan kómek pen nátıjeli ózara is-qımyl kórsetkeni úshin rızashylyǵyn bildiredi.
Evakýasııalyq is-sharalardy daıyndaý jáne ótkizý barysynda el dıplomattary táýlik boıy jergilikti bılikpen is-qımyldy úılestirip, marshrýttardyń logıstıkasyn qamtamasyz etti, sondaı-aq quzyretti organdarmen ózara is-qımyl jasady jáne otandastarymyzǵa qajetti qoldaý kórsetti.
Qysqa merzimde 200-den asa azamatymyz habarlasyp, olarǵa kómek kórsetildi. Irandaǵy barlyq el azamattarymen úzdiksiz baılanys ornatylyp, olardyń aldyn ala kelisilgen tranzıttik baǵyttary boıynsha júrip-turýy uıymdastyryldy.
Otandastarymyzdy elge qaıtarý boıynsha jumys áli de jalǵasady. Sondaı-aq qazirgi ýaqytta SIM basqa quzyretti vedomstvolarmen birlesip el azamattaryn Izraıl memleketinen evakýasııalaýdy pysyqtap jatyr. Sheteldegi azamattarymyzdyń quqyǵy, qaýipsizdigi men amandyǵy – elimizdiń syrtqy saıası baǵytynyń asa mańyzdy basymdyǵy.
Osydan birer kún buryn Syrtqy ister mınıstrligi Taıaý Shyǵys óńirindegi qaýipti áskerı shıeleniske baılanysty óz alańdaýshylyǵyn bildirip, eldiń Izraıl memleketindegi elshiligi sol aımaqtaǵy otandastar úshin jedel jeli telefon nómirlerin jarııalady.
«Taıaý Shyǵystaǵy jaǵdaıdyń ýshyǵýyna baılanysty elimizdiń Tel-Avıvtegi elshiligi Izraıldegi barlyq azamattarymyzǵa Tyl qolbasshylyǵynyń nusqaýlaryn (https://www.oref.org.il/ru)
saqtaýǵa, qaýipsizdik sharalaryn barynsha kúsheıtýdi, saqtyq pen qyraǵylyq tanytýdy, sońǵy jańalyqtardy qadaǵalaýdy, sondaı-aq Qazaqstan elshiligimen baılanysta bolýdy suraıdy», delingen habarlamada.
