Semeı qalasynda salynatyn oblystyq kópsalaly aýrýhananyń irgetasyn qalaý rásimi ótti. Igilikti is-sharaǵa oblys ákimi Berik Ýálı, densaýlyq saqtaý salasynyń ardagerleri, dárigerler qatysty.
Abaı oblysyn damytýdyń keshendi josparyna sáıkes boı kóteretin, 300 tósektik kópsalaly aýrýhanada bir aýysymda 250 adamdy qabyldaıtyn keńes berý, tekserý bólimi jumys istemek. Oblys basshysy medısınalyq nysannyń óńir turǵyndary úshin mańyzy zor ekenin atap aıtty.
«Abaı oblysy – erteden dárigerlik dástúri qalyptasqan óńir. Aımaǵymyzdan shyqqan bilikti mamandar qazaq medısınasynyń negizin saldy. Sońǵy shırek ǵasyr ıininde bul sala nazardan tys qalyp, bilikti mamandardyń basym bóligi basqa óńirlerge qonys aýdardy. Sondyqtan bul aýrýhananyń irgetasyn qalaý – sol úzilgen dástúrdi qaıta jalǵaýdyń nyshany. Merdiger kompanııa ókilderi atap ótkendeı, aýrýhana ozyq úlgili medısınalyq tehnologııalarmen jabdyqtalady. Oblysymyzda osy ýaqytqa deıin mundaı san salaly aýrýhana bolǵan emes. Endi sol olqylyqtyń orny tolady», dedi oblys ákimi.
Oblysta búginde 31 stasıonarlyq medısınalyq uıym jumys isteıdi, onyń 20-y memlekettik, 11-i jekemenshik. Aımaq kóleminde ár 10 myń turǵynǵa nebári 59 tósektik orynnan keledi. Bul – elimizdegi eń tómengi kórsetkishterdiń biri. Mamandandyrylǵan medısınalyq qyzmettiń 70%-y Semeı qalasynda shoǵyrlanǵan. Qazirgi stasıonarlardyń basym bóligi eski, materıaldyq-tehnıkalyq bazasy tozǵan. Jedel medısınalyq járdem aýrýhanasy 300 tósekke shaqtalǵanymen, is júzinde 375 naýqasty qabyldap otyr. Kardıologııa, ınsýlt, gınekologııa, toksıkologııa, nevrologııa, travmatologııa bólimderinde tósektik oryn tapshy. Jańa aýrýhana osy tapshylyqty joıyp, zaman, qoǵam talabyna saı medısınalyq kómek kórsetýdi qamtamasyz etedi. Sonymen qatar aýyl turǵyndaryna qashyqtan keńes beretin telemedısına ortalyǵy qurylady. Medısınalyq nysan 2027 jyly paıdalanýǵa berilmek.
Abaı oblysy
