Oqýshylar «Darabozda» demalady

Abaı oblysy Maqanshy aýda­nyndaǵy «Daraboz» jazǵy saýyqtyrý-demalys lageri bala­lardyń alǵashqy legin qabyldady. Oblystyq bilim basqarmasynyń málimetinshe, lager jumysy 6 maýsym (ár maýsym – 10 kún) ótedi. Ár kezeńde 120 bala qabyldanyp, jaz boıy 720 oqýshy elimiz­diń tanymal týrıstik aımaǵy – Alakól jaǵasynda demalady. Dema­lýshylardyń qatarynda mek­tepte oqý jylyn úzdik aıaqtap, belsendilik tanytqan aýyldyq jerlerdegi 250 oqýshy bar.

«Daraboz» lagerinde 5-8 synyp oqýshylarynyń (10-14 jastaǵy) jazǵy demalysyn mazmundy da maǵynaly ótýine bar múmkindik qarastyrylǵan. Oqýshylar jer­gilikti bıýdjet pen «Qazaqstan halqyna» qoǵamdyq qory esebinen demalady. Balalardyń demalysyn uıymdastyrýǵa 10 pedagog tartylǵan. Olardyń qatarynda aǵa tálimger, tárbıeshiler, dene shynyqtyrý pániniń muǵalimi, júzýden nusqaýshy jáne medbıke bar. Mamandar balalarǵa qyzyqty, oıyn-saýyq jáne tárbıelik mándi baǵdarlamalar uıymdastyrýmen qatar, qaýip­sizdigin de qadaǵalaıdy. Lager aýmaǵy sanıtarlyq-epıde­mııa­lyq jáne órt qaýipsizdigi talaptaryna tolyqtaı saı keledi.

Demalys baǵdarlamasynda tańǵy jattyǵý, júzý, sporttyq jarys, shyǵarmashylyq úıirmeler men klýbtar (bı, qolóner, sport, aqyndar úıirmesi), ekskýrsııalar, zııatkerlik oıyndar, bı kesh­teri, ózge de is-sharalar bolmaq. «Daraboz» lageri balalardyń densaýlyǵyn nyǵaıtyp, qaı salada da qabiletin damytýǵa kúsh salady.

Bıyl Abaı oblysynda shamamen 5000-ǵa jýyq mektep oqýshysy qala syrtyndaǵy lagerlerde demalady. Bul týraly óńirlik kommýnıkasııalar qyzmeti alańynda ótken baspasóz máslıhatynda oblystyq bilim basqarmasy tárbıe jumysy jáne qosymsha bilim berý bóliminiń basshysy Sáýle Qojebekova baıandady.

– Jaz mezgilinde óńirde bar­lyǵy 9 lager turaqty túrde ju­mys isteıdi. Olardyń qataryn­da 8-i memlekettik, 1-eýi jekemenshik. Áleýmettik osal sanattaǵy 4713 bala «Vseobých» qorynyń esebinen tegin joldamamen qamtylady, – deıdi S.Qojabekova.

Sonymen qatar oblystaǵy 128 oqýshy respýblıkalyq «Bal­dáý­­ren» jáne «Bóbek» lagerine bara­dy. Al keler jyly Kókpekti aýda­nyndaǵy «Baldáýren» lagerin qal­­pyna keltirý josparlanyp otyr.

Abaı oblysy