«Dáriger Talks»: «Amanat» partııasy dárigerlerdiń basyn qosty

Sóz basynda Májilis spıkeri, «Amanat» partııasynyń tóraǵasy Erlan Qoshanov is-sharaǵa qatysýshylardy ótken Medısına qyzmetkeri kúnimen quttyqtady. Ol dárigerlerdiń el ómirindegi erekshe rólin atap ótip, densaýlyq saqtaý júıesin damytý máselesi ár kez Memleket basshysynyń nazarynda ekenin jetkizdi.

– Prezıdent Qasym-Jomart Toqaev atap ótkendeı, medısına qyzmetkerleri beı­bit kúnniń batyrlary degen atqa laıyq. Bú­gin­de otandyq medısına jarqyn nátı­je kór­setip keledi. Dárigerlerimiz sanaý­ly mem­lekette ǵana qoljetimdi eń kúr­deli trans­plantasııalyq operasııalar jasaıdy. «Amanat» partııasymen birge alǵa qoı­ǵan ar­man-maqsattaryńyzǵa jetip, azamattary­myzdyń densaýlyǵy men turmysyn jaqsartý jolynda qaltqysyz qyzmet etip kelesizder. Bul – biz úshin asa mańyzdy, – dedi ol.

Májilis tóraǵasy medısına qaýymdas­tyǵynyń ókilderi partııanyń mańyz­dy tiregi ekenin atap ótti. Sebebi árbir úshinshi medısına qyzmetkeri – «Amanat» múshesi. Osy oraıda «Dáriger Talks» platformasy otandyq medısına­nyń ózekti máseleleri ashyq talqylana­tyn jáne ony odan ári damytý bo­ıynsha mańyz­dy mindetter ázirlenetin biregeı alań­ǵa aınaldy. Máselen, ózekti taqyryptardyń biri – aýyldaǵy medısına qyzmetkerleriniń tapshylyǵy. Atalǵan máseleni sheshý maqsatynda aýyldyq jerge kóship barǵan 700-ge jýyq medısına qyzmetkerine byltyrdan bastap 100 ETJ (shamamen 9 mln teńge) kóleminde kóterme járdemaqy tólendi. Bul norma «Amanat» partııasynyń saılaýaldy baǵdarlamasynda qarastyrylǵan edi.

Sondaı-aq depýtattyq korpýs pen Den­saýlyq saqtaý mınıstrliginiń birles­ken jumysy arqyly medısına qyz­met­kerlerine biliktilik sanattaryn berý­diń jańa júıesi ózgertildi. Myńdaǵan dári­ger men medbıke testileýsiz balamaly bil­ik­tilik deńgeıin aldy. Bul – medı­sına qyz­metkerleriniń partııaǵa joldaǵan kóptegen ótinishine jaýap retinde qabyldanǵan sheshim. Buǵan qosa Májilistegi «Amanat» frak­sııasynyń músheleri dári-dármekter men me­dısınalyq qyzmetterge 10% QQS engizý­ge qarsy­lyq bildirdi. Prezıdent tap­syr­masy bo­ıynsha dárigerlerdi kási­bı saqtandyrý júıesi engizildi: budan bylaı dárigerdiń qateliginen oryn alǵan shyǵyndar mamandardyń jeke qara­jaty­nan emes, bıýdjet esebinen jabylady.

Alaıda otandyq dárilik preparattarmen qamtamasyz etý, MÁMS júıesiniń ashyqtyǵy syndy birqatar másele áli de bar. Medısına qyzmetkerlerine qol jumsaý máselesi tolyq sheshilgen joq. Búginde medısına qyzmetkerleri­niń kásibı qyzmetine ózge tulǵalardyń kedergi keltirýinen qorǵaıtyn normalar kúsheıtildi. Sonymen qatar «Amanat» fraksııasynyń músheleri dárigerlerge qatysty zorlyq-zombylyq jasaǵan adamdar úshin jeke qylmystyq jaýapkershilik qarastyrý máselesi boıynsha túzetýler engizýge bastamashylyq etti.

Sondaı-aq is-shara barysynda Premer-mınıstrdiń orynbasary Ermek Kósherbaev jáne Densaýlyq saqtaý mınıstri Aqmaral Álnazarova sóz sóıledi. Al «Dáriger Talks» partııalyq dıalog alańyna qatysýshylar ózderiniń jeke qalyptasý tarıhymen bólisip, áriptesterimen birge kásibı syn-tegeýrinderdi talqylady.

Máselen, Qyzylorda qalasyndaǵy Kópbeıindi oblystyq aýrýhananyń №1 tera­pııa bólimshesiniń meńgerýshisi, endokrınolog Elena Shaı bolmashy gormonal­dyq aqaýlardyń ózi kúrdeli másele týyndatýy múmkin ekenin, sondyqtan táýekeldi ýaqtyly anyqtap, em qabyldaı bastaý asa mańyzdy ekenin aıtty.

Qazaqstan medısınalyq týrızm qaýymdastyǵynyń prezıdenti Krıstına Krıvestiń aıtýynsha, Qazaqstanda medısınalyq qyzmet quny damyǵan elderge qaraǵanda aıtarlyqtaı arzan, alaıda emdeý sapasy álemdik standarttarǵa saı keledi. Bul elimizge keletin sheteldik medısınalyq týrıster úshin asa tartymdy. Jyl saıyn álemdegi 45 memlekettiń 10 myńnan asa azamaty em qabyldaý úshin elimizge arnaıy at basyn burady.

Jetisý oblysy Aqsý aýdanynyń jedel járdem feldsheri Saıat Myrzahanov dárigerdiń tabandylyǵy men tapqyrlyǵy qansha­lyqty mańyzdy ekenin atap ótti. Máselen, oǵan jańbyr joldy shaıyp, kólikpen júrý múmkin bolmaı qalǵan kezde atqa minýine týra kelgen eken. Osylaısha, ol naýqasqa ýaqtyly jetipti. Aqtóbedegi M.Ospanov atyndaǵy Batys Qazaqstan medısına ýnıversıtetiniń radıologııa kafedrasynyń meńgerýshisi Erbolat Iztileýov adam papıllomavırýsyna qarsy ekpege nemquraıdy qaraýdyń qaıǵyly saldaryna nazar aýdardy. Semeıdegi perınataldyq ortalyqtyń neonataldyq bloginiń basshysy Gúljazıra Dúısekenova júktiliktiń 25-aptasynda dúnıege kelgen salmaǵy nebári 470 gramdy quraı­tyn qyzdy dárigerler qalaı aman alyp qalǵanyn aıtty.

Petropavl qalasyndaǵy Kópsalaly oblystyq balalar aýrýhanasynyń konsýl­ta­tıvtik-dıagnostıkalyq ortaly­ǵynyń meńgerýshisi Arlan Baltabekov apparattyq tele­me­dısınany qoldaný barysyndaǵy jetis­tik­termen bólisti. Osy arqyly shal­ǵaı aýyldardyń turǵyndary oblys ortaly­ǵyna qatynamaı-aq tar beıindi medısınalyq kómekke qol jetkizip jatyr. «Esen Foun­dation» qorynyń densaýlyq saqtaý salasyna qatysty jobalarynyń jetekshisi Leıla Ishbaeva Aqmola oblysy Selınograd aýdanynda «Baquatty audan» qanatqaqty jobasyn júzege asyrýdyń aralyq qorytyndysyn usyn­dy. Osylaısha, mentorlyq júıeni engizý arqyly aýyldaǵy 300 mamannyń Asta­nadaǵy áriptesterimen tikeleı keńesý múm­kin­digi paıda boldy.

Ortalyq klınıkalyq aýrýhanadaǵy neırohırýrgııa ortalyǵynyń jetekshisi Myńjylqy Berdiqojaev pen Almatydan kelgen neırohırýrg-dáriger Marat Sarshaev otandyq dárigerler fransýz áriptesterin oqytyp jatqanyn málimdedi. Elimizdegi eń kóne aýrýhananyń neırohırýrgteri sheteldik áriptesterine sheberlik saǵatyn ótkizip, tikeleı efırde mıǵa asa kúrdeli eki operasııa jasady.

Otyrys moderatory belgili telejúr­gizýshi Irına Ten boldy.

Kezdesý sońynda «Amanat» partııa­synyń tóraǵasy Erlan Qoshanov jáne Densaýlyq saqtaý mınıstri Aqmaral Álnazarova kásibı qyzmeti barysynda elge sińirgen eńbegi úshin birqatar medısına qyzmetkerin marapattady.