Polıseıdi nege bótensımiz?

Bir mezette birneshe aýylda bolǵan sol shýdyń arty nemen aıaqtalǵany málim. Aıtpaǵymyz bul emes, ahýal­dy tynyshtandyrý maqsatynda áreket etken polıseılerge baǵynyp, tártip saqshylarynyń talabyn oryndap, olarǵa kúsh kórsetpegende aqparaty álemge taraǵan qaıǵyly Masanshy oqıǵasy bolmas pa edi deımiz...

Prezıdent Qasym-Jomart Toqaev Qazaqstan polısııasynyń 30 jyldyq mereıtoıynyń saltanatty jıynynda sóılegen sózinde quqyq qorǵaý júıesine túbegeıli reforma jasaý kózdelip otyr­ǵanyn aıtqan. Al bul ózgeristi halyqtyń qoldaýymen ǵana tabysty júzege asyra alatynymyzdy da eskertken.

Qazir qoǵamda polıseıden kózge túr­pi­deı tıetin jaǵymsyz keıipker jasap al­ǵanbyz. Qıt etse telefonǵa túsirip, «Qu­jatyńdy kórset, bul jerde ne istep júr­siń, jumysyńdy nege istemeısiń?» dep tár­tip saqshylarynyń berekesin alatyndar kóbeıdi. Tipti ótkende ashanada túski as iship otyrǵan bir top polıseıdiń ústinen túsip, «Nege as iship otyrsyńdar, jumystaryń qaıda, bas kıimderiń qaıda?» dep dúrse qoıa bergen atyraýlyq blogersymaqtyń áreketi tipti uıat, tym usaqtyq.

Jalpy, osyndaı jaǵdaıda azamattarmen tikeleı qarym-qatynas jasaı otyryp, ár polıseı memleket týraly belgili bir kózqarastyń qalyptasýyna yqpal etetini anyq. «Qoǵam kózqarasynda polıseı – bıliktiń ýákiletti ókili, ásirese aýyldyq jerlerde ýchaskelik polıseıdi árbir úı tanıdy deýge bolady. Onyń sózi men áreketine qaraı azamattardyń memlekettik saıasatqa jáne elde júrgizilip jatqan reformalarǵa degen kózqarasy qalyptasady. Bul týraly sizder, polısııa qyzmetkerleri, eshqashan umytpaýlaryńyz kerek. Sizderge erekshe jaýapkershilik júkteledi», degen-di Memle­ket basshysy polısııanyń 30 jyldyq mereı­toıynyń saltanatty jıynyn­da.

Degenmen Memleket basshysy azamat­tar­dyń quqyq qorǵaý júıesine degen senimi áli de joǵary deńgeıde emes ekenin jasyrmady. «Jekelegen ádiletsizdik jaǵdaılary, polıseılerdiń nemquraıdylyǵy, keıde olardyń zańǵa qaıshy áreketteri Ishki ister mınıstrliginiń barlyq qurylymynyń qyzmetine kóleńke túsiredi», degen Prezıdent sóziniń jany bar.

Rasynda, keıingi jyldary polısııanyń bedeli týraly sóz jıi qozǵalyp júr. Osy rette otandyq polısııanyń aıbyndy, aıbarly bolýy úshin ne istemek kerek? Jalpy, polısııa qyzmeti eń qıyn mamandyqtyń biri ekenine daýymyz joq. Kóbine polıseıler qaýip-qaterdiń ortasynda júredi. Árıne, táýelsizdik alǵaly beri keıbir fýnksııalaryn aıtpaǵanda, polısııanyń qyzmettik formalary men qyzmet ataýlaryna deıin ár kez ózgerip jatyr. Biraq basty mindetteri sol kúıi ózgerissiz qala berdi. Sol qyzmetti shyn júrekpen, sanaly minez-qulyqpen jáne shynaıy nıetpen atqaratyn qyzmetkerlerdiń kóptep tabylýy asa mańyzdy. Adam bar yntasymen qyzmetine berilgende ǵana nátıje shyǵady. Olaı etpeıinshe, bári beker. Eshteńe ónbeıdi.

Endeshe, búgingi polıseı qandaı bolýy kerek? Bizdińshe, aryn janynyń sadaǵasyna balaıtyn namysshyl adam ǵana polısııa qyzmetkeri bolǵany abzal. Ár tártip saq­shy­sy adamgershilikten attap ketpeıtin, polısııanyń abyroıyn óz abyroıym dep biletin, ar men uıatty paıymdaı alatyn zerdeli azamat bolýy shart.

Polısııa bedeldi bolýy úshin memleket qandaı qadam jasaýǵa tıis degen de zańdy suraq týady. Qazir polısııanyń bedelin kóteretin ıdeologııamyzdyń aqsap turǵany belgili. Polısııa qyzmetkerleriniń erlik isteri týraly jınaqtar, kórkem fılmder jáne mýzykalyq týyndylar shyǵarýdy myqtap qolǵa alý kerek. Iаǵnı jazýshylar, aqyndar, jýrnalıster, sýretshiler jáne kıno mamandarymen kezdesýler uıymdastyryp, polısııanyń bedelin arttyrý joldaryn izdestirse, quba-qup bolar edi.