Prezıdent bastamalary Qostanaı oblysynda júıeli túrde júzege asyrylyp keledi. Sonyń jarqyn mysaly – Qadyrbek Ospanov atyndaǵy №1 balalar-jasóspirimder sport mektebiniń qaıta jańǵyrtýdan keıingi ashylýy.
1979 jyly negizi qalanǵan bul mektep óńirdegi balalar sportynyń aldyńǵy qatarly mekemeleriniń biri sanalady. Munda Olımpıada oıyndarynyń qatysýshylary – Sergeı Ýshkalov pen Stanıslav Kýzmın (júzý), 29 halyqaralyq dárejedegi sport sheberi jáne 73 Qazaqstan Respýblıkasynyń sport sheberi tárbıelengen.
Búginde mektepte júzý, basketbol, gandbol, velosport jáne trıatlon bólimderi jumys isteıdi. 1157 jas sportshy turaqty túrde jattyǵýǵa qatysady. Qaıta jańǵyrtýdan keıin mekteptiń bazasy keńeıip, boks jáne sýǵa sekirý bólimderi ashylady. Sonymen qatar, endi bul mekeme qala turǵyndaryna, onyń ishinde qozǵalysy shekteýli jandarǵa da saýyqtyrý baǵytynda qyzmet kórsetetin bolady.
Aımaqtaǵy sporttyq ınfraqurylym júıeli túrde damyp keledi. Sońǵy úsh jylda oblysta 18 jańa sport nysany, onyń ishinde 11 dene shynyqtyrý-saýyqtyrý kesheni salyndy. Jyl sońyna deıin taǵy úsh nysan paıdalanýǵa beriledi. Búginde óńirde 367 myńnan astam turǵyn buqaralyq sportpen aınalysady. Al mektep jasyndaǵy balalardyń 62 paıyzy tegin sport seksııalaryna qatysady.
Sonymen qatar, Memleket basshysy tapsyrǵan taǵy bir mańyzdy mindet – bilim berý mekemelerin qadamdyq qoljetimdilikpen qamtamasyz etý – óńirde sheshimin tabýda.
Qostanaı qalasynyń qarqyndy damyp kele jatqan «Áýejaı» shaǵyn aýdanynda 280 oryndyq jańa memlekettik balabaqsha ashyldy. Bul nysandy aýdan turǵyndary, ásirese jas otbasylar kópten kútken bolatyn.
Oblys ákimi Qumar Aqsaqalov balabaqshanyń ashylýynda:
«Eki jyl buryn osy shaǵyn aýdannyń turǵyndarymen kezdesýde balabaqshanyń mańyzdylyǵy týraly aıtqan edik. Mine, búgin bul nysan boı kóterip, balalardy qabyldaýǵa daıyn. Ol balalar úshin jaıly ári jyly uıaǵa aınalatynyna senemin»,– dep atap ótti.
Jańa balabaqshada qazaq jáne orys tilderinde bilim beretin 16 top jumys isteıdi. Munda jaıly oqý jáne oıyn bólmeleri, sport jáne shyǵarmashylyq zaldary, etnomádenı buryshtar, balalarǵa arnalǵan shaǵyn zerthana jáne QR-kod arqyly qoljetimdi aýdıoertegiler men kitaptar usynylatyn mobıldi kitaphana bar. Balalardyń qaýipsizdigine erekshe nazar aýdarylǵan – beınebaqylaý, dabyl túımesi men órtke qarsy júıeler ornatylǵan.
Mekemede 75 jańa jumys orny quryldy, onyń 45-i — pedagogtar.
Sońǵy eki jylda oblysta 1700-den astam orynǵa arnalǵan 10 balabaqsha ashyldy. Qostanaı qalasynda ashylǵan úsh jańa balabaqsha 2 jastan asqan balalar kezegin úshten birge qysqartýǵa, al 3 jastan asqan balalardyń kezegin tolyq joıýǵa múmkindik berdi.
Osylaısha, Qostanaı oblysynda mektepke deıingi tárbıe men balalar sportynan bastap jan-jaqty damýǵa jaǵdaı jasaıtyn orta qalyptasyp keledi. Bul – balalardyń bolashaǵyna salynǵan senimdi ınvestısııa.
