- Vetnamda aıaqtalǵan jastar arasyndaǵy Azııa chempıonatynda elimizdiń balýandary tabysty óner kórsetti. Grek-rım kúresinen ótken jarystyń jalpykomandalyq esebinde jerlesterimiz kósh bastasa, erkin kúres sheberleri Úndistannan qalyp qoıyp, ekinshi oryndy ıelendi. Áıelder quramasy dodany úshinshi orynmen qorytyndylady. Bul básekede úndi, mońǵol qyzdary aldymyzdy orap ketti.
- Sofııada ótken jasóspirimder arasyndaǵy álem birinshiliginde Aqmaral Erekesheva úsh ret jeńis tuǵyryna kóterildi. Ol «dop» pen «taspa» jattyǵýlarynda altynnan alqa taqsa, «urshyqta» kúmis medaldy moınyna ildi.
- Tashkentte ótken Gennadıı Arzýmanovtyń memorıalynda 200 metrge júgirgen Vıtalıı Zems bas júldeni oljalady. Qaraǵandylyq sprınter bul qashyqtyqty 20.88 sekýndta júgirip ótti. Ekinshi, úshinshi oryndardy túrik Batýhan Altyntas pen ózbek Úmid Nábıev ıelendi.
- Taılandta jaǵajaı voleıbolynan jastar arasyndaǵy Azııa birinshiligi (U-21) aıaqtaldy. Bul jarysta Klım Rıýhov pen Vladıslav Mastıhın bas júldeni ıelendi. Elimizdiń juby fınalda qytaılyq qarsylastaryn 2:0 (21:19, 21:16) esebimen utty. Osy jeńisiniń arqasynda bizdiń jigitter qazan aıynda Meksıkada jalaýy jelbireıtin álem chempıonatynyń joldamasyna ıe boldy.
- Tashkentte sporttyq gımnastıkadan «Challenge Cup» jarysynyń alǵashqy kúni elimizdiń quramasy úsh júlde enshiledi. Erlerdiń «qossyryǵynda» Ilııas Ázizov kúmis, Dmıtrıı Patanın qola medal ıelendi. Jerlesterimiz ózbekstandyq Ahrorhon Temırhonovtan qalyp qoıdy. «Bórenede» Kórkem Erbosynqyzy úshinshi orynǵa ıe boldy.
- Germanııanyń Galle qalasynda ótken ATP 500 serııasyndaǵy týrnırde Aleksandr Býblık top jardy. Bastapqy básekelerinde barlyq qarsylasynan basym túsken ol jartylaı fınalda reseılik Karen Hachanovty qapy qaldyrdy. Fınalda Býblıkti kórshi eldiń taǵy bir ataqty tennısshisi Danııl Medvedev kútip turdy. Otandasymyz ony da utty – 6:3, 7:6. Sondaı-aq osy jarystyń alǵashqy aınalymynda Aleksandrdyń álemniń birinshi raketkasy, ıtalııalyq Iаnnıs Sınnerge san soqtyrǵanyn da aıta ketken abzal. Zarına Dıas Ispanııadaǵy ITF W35 dodasynda dara shyqty. Sheshýshi tusta ol ıtalııalyq Dıletta Cherýbınıdi utty – 6:1, 6:7, 6:1.
- Fýtboldan elimizdiń premer-lıgasynyń 13-týrynda mynadaı nátıje tirkeldi: «Jeńis» – «Atyraý» 2:0, «Qaırat» – «Qyzyljar» 1:0, «Tobyl» – «Jetisý» 2:1, «Elimaı» – «Turan» 2:1, «Oqjetpes» – «Ordabasy» 0:1, «Aqtóbe» – «Astana» 0:1, «Qaısar» – «Ulytaý» 1:1. Jarys kestesinde «Astana» birinshi orynda keledi. Elordalyq klýb 33 upaı oljalap otyr. Ony ókshelep kele jatqan «Qaırattyń» basty básekelesinen úsh upaıy kem. Kósh sońyndaǵy «Atyraýdyń» qorjynynda nebári 4 upaı.
