Jergilikti pedagogıkalyq jáne ǵylymı-akademııalyq qaýymdastyq, úkimettik emes uıym ókilderiniń qatysýymen ótken is-sharany Prezıdent janyndaǵy Qazaqstannyń strategııalyq zertteýler ınstıtýty uıymdastyrdy.
Pikirtalas barysynda Ulttyq quryltaı sheshimderiniń júzege asyrylýyna qatysty ózekti máseleler, onyń ishinde qoǵamdyq qatysý men baqylaý tetikteri, azamattyq qoǵamnyń, qoǵamdyq keńester men ǵylymı qaýymdastyqtyń memlekettik saıasatty ázirleý jáne monıtorıngteý úderisterindegi róli talqylandy.
Alań qatysýshylaryn onlaın formatta qarsy ala otyryp, Prezıdent janyndaǵy QSZI dırektory Jandos Shaımardanov qoǵamdyq baqylaý men monıtorıngtiń memlekettik saıasattyń ashyqtyǵy, eseptiligi jáne tıimdiligin arttyrýdyń ajyramas quraldary ekenin atap ótti.
«Biz talqylaýlardy astanada emes, óńirlerde ótkizý týraly oılastyrylǵan sheshim qabyldadyq, óıtkeni QSZI óńirlik saraptamalyq áleýetti damytýǵa erekshe kóńil bóledi. Ulttyq Quryltaıdyń sheshimderi naqty júzege asyrylatyn da, praktıkalyq syn-qaterlerge tap bolatyn da – dál osy jergilikti jerler. Sondyqtan biz ekinshi talqylaýdy tarıhı-mádenı murasy baı, strategııalyq ekonomıkalyq áleýeti joǵary ári ınvestısııalyq tartymdylyǵy artyp kele jatqan óńir – Abaı oblysynda ótkizýdi jón kórdik», dedi QSZI dırektory.
QSZI dırektorynyń orynbasary Alýa Joldybalına alań qatysýshylaryn ashyq dıalogqa shaqyryp, óńirlik sarapshylardy yntymaqtastyqqa úndedi.
«О́tken jyly ınstıtýtta óńirlermen jumys isteýge baǵyttalǵan arnaýly bólim qurylyp, onyń negizinde óńirlik ókilder jelisi qalyptastyryldy. Búginde bizdiń ókilder elimizdiń 9 óńirinde jumys istep jatyr», – dedi A.Joldybalına.
Osy taqyrypty jalǵastyra otyryp, Alikhan Bokeikhan University rektory Aleksandr Koıchýbaev bul jetekshi óńirlik joǵary oqý ornynda iske asyrylyp jatqan, ýnıversıtetti ulttyq deńgeıge shyǵaratyn bastamalar týraly aıtty.
Pikirtalas barysynda sarapshylar, ǵalymdar, úkimettik emes uıym ókilderi óńirlerdegi qoǵamdyq baqylaý men saraptamalyq áleýetti kúsheıtýge qatysty ıdeıalarymen jáne bastamalarymen bólisti.
Abaı oblystyq qoǵamdyq keńesi tóraǵasynyń orynbasary, ÚEU qaýymdastyǵynyń vıse-prezıdenti Nıkolaı Isaev óz sózinde óńir ókilderin ortalyq memlekettik organdar janyndaǵy qoǵamdyq keńesterdiń quramyna engizýdi usyndy.
Qazaqstannyń Ulttyq jaratylystaný ǵylymdary akademııasynyń akademıgi, professor Zeınýlla Toqaev agroónerkásip kesheniniń negizi retinde agrarlyq ǵylymdy damytý qajettigin atap ótti. Ardagerler keńesiniń múshesi Asqat Dıýsembaev Semeıdiń portty qala retindegi áleýetine jáne Ertis ózenindegi jolaýshylar men júk tasymalyn jandandyrý múmkindigine nazar aýdardy.
О́ńirlik sarapshylar qaýymdastyǵynyń ókilderi aıtqan usynystar men bastamalar Ulttyq Quryltaı qyzmetiniń mazmunyn keńeıtýge negiz bolýda.
Aısara Hýanyshqyzy,
L.Gýmılev atyndaǵy EUÝ-diń 2-kýrs stýdenti
