Ulytaý oblysy ákiminiń orynbasary Zına Jumanazarqyzy jańa mýzeıdiń ashylýyn «Ulytaýdyń mádenı-rýhanı damýyna qosylǵan súbeli úles» dep baǵalady. Astanadaǵy Ulttyq mýzeı dırektory Berik Ábdiǵalıuly mádenı nysannyń ulttyq sana men tarıhı zerdeni jańǵyrtýǵa qosar mańyzyn atap ótti. Ulytaý aýdanynyń qurmetti azamaty Rysqalı Ábdikerov pen qoǵam qaıratkeri Almaz Sharmanov mýzeıdiń bolashaq urpaqqa berer tarıhı-tanymdyq taǵylymyn tilge tıek etti.
Jańa mýzeıde akademık Tóregeldi Sharmanovqa arnalǵan kabınet bar. Ol Almaty qalasyndaǵy Ulttyq taǵamtaný ınstıtýtyndaǵy kórnekti ǵalymnyń eńbek kabınetiniń kóshirmesi ispetti. Áke rýhynyń týǵan jerimen baılanysyn tereńdete túsý maqsatynda – kabınettiń Ulytaý aýdandyq tarıhı-ólketaný mýzeıinen oryn alýyna akademıktiń uly Almaz Sharmanov uıytqy bolypty.
Meımandar alǵashqy ekskýrsııaǵa qatysty. Mýzeı basshysy Rahat Tahanuly ózi bastap aralatyp, ár zaldaǵy jádiger tarıhyna toqtaldy.
«Mýzeı birneshe ekspozısııalyq zaldan turady: «Kóne Ulytaý» zaly, «О́lke tarıhy» zaly, Akademık Tóregeldi Sharmanov kabıneti, «Qazaqtyń ulttyq aspaptary» zaly. «Qazaqtyń ulttyq aspaptary» zaly – ulttyq mýzykalyq muraǵa arnalǵan keńistik. Bul zalda Ulytaýdyń ónerpazy, qolóner sheberi, ulttyq mýzyka janashyry Azamat Baqııanyń qolynan shyqqan 70-ke jýyq aspap qoıylǵan», deıdi Ulytaý aýdandyq tarıhı-ólketaný mýzeıiniń kishi ǵylymı qyzmetkeri Svetlana Júsipqyzy.
Qolóner sheberi, mýzykant Azamat Baqııa zalda sheberlik sabaǵyn ótkizip, qonaqtarǵa aspaptardyń shyǵý tarıhy men ereksheligin tanystyrsa, «Joshy» etno-folklorlyq ansambli ulttyq áýenmen saltanatty sáttiń sánin
kirgizdi.
Jańadan ashylǵan Ulytaý aýdandyq tarıhı-ólketaný mýzeıi – eldiń ótkeni men bolashaǵyn jalǵap, urpaq sanasyna ulttyq bolmysty sińiretin altyn kópir. Aldaǵy ýaqytta ulttyń uly muratyn ulyqtaıtyn ortalyqqa aınalady degen senimdemiz.
Ulytaý oblysy
