Senat tóraǵasy baıqaý laýreattaryn quttyqtaı kele, qoǵamdyq pikir qalyptastyrý jáne ultty ortaq múddege uıystyrý jolynda buqaralyq aqparat quraldary mańyzdy ról atqaratynyn aıtty. Sondaı-aq ol jýrnalıster memleket pen azamattar arasyndaǵy altyn kópir, áleýmettik ahýaldyń barometri ekenine nazar aýdardy. Shyn máninde, BAQ ókilderi elde bolyp jatqan ózgeristerdiń mánin halyqqa jetkizip, ártúrli kózqarasty kórsetedi. M.Áshimbaev óz sózinde eldiń áleýmettik-ekonomıkalyq jáne saıası baǵdarynyń basym baǵyttaryna toqtalyp, kezdesýge qatysýshylarǵa ádiletti, qaýipsiz, taza jáne qýatty Qazaqstandy qurýǵa qosyp kele jatqan belsendi úlesteri úshin alǵys aıtty.
«Prezıdent Qasym-Jomart Toqaevtyń bastamasymen elimizde keshendi reformalar iske asyrylyp jatyr. Olar ekonomıkany ártaraptandyrý, ómir súrý sapasyn jaqsartý jáne azamattardyń ál-aýqatyn arttyrýdy kózdeıdi. Sapaly bilimmen jáne medısınalyq qyzmetpen qamtamasyz etý máselelerine basa mán berilip jatyr. Azamattardyń elimizde bolyp jatqan ózgerister jóninde tolyq jáne obektıvti aqparat alýy sizderge tikeleı baılanysty. Sondyqtan jýrnalısterdiń qyzmeti qashanda qurmetke laıyq. Osy rette jýrnalısterdiń parlamenttik pýlynyń jumysyna da erekshe toqtalǵym keledi. Sizder Senattyń Memleket basshysynyń reformalaryn zańnamalyq turǵydan qamtamasyz etýge arnalǵan qyzmetin dáıekti jáne jedel nasıhattap, qabyldanǵan zańdardyń mánin túsindirip, ádiletti, qaýipsiz, taza jáne qýatty Qazaqstan qurýǵa eleýli úles qosyp kelesizder», dedi Senat tóraǵasy.
Sonymen qatar M.Áshimbaev palata jumysynyń qorytyndysyna nazar aýdaryp, senatorlardyń óńirlerde ótkizgen kóshpeli otyrystarynan habar taratý arqyly qoǵamdy tolǵandyrǵan ózekti máselelerdi oń sheshý isinde BAQ-tyń yqpaly zor ekenin tilge tıek etti. Depýtattyq saýaldardy, turaqty komıtetterdiń qyzmetin jáne qaralatyn zańdardy ýaqtyly ári obektıvti jarııalaýdyń mańyzdy ekeni de sóz boldy.
Jalpy, bıyl Senat uıymdastyrǵan «Parasat» baıqaýyna 100-den asa jumys kelip tústi. Avtorlardyń qatarynda telearnalardyń, baspasózdiń, aqparat portaldarynyń jáne ózge de otandyq medıanyń jýrnalısteri bar.
Sonymen 2025 jylǵy «Parasat» baıqaýynyń jeńimpazdary myna atalymdar boıynsha anyqtaldy: «Úzdik televızııalyq materıal» – Azamat Nuǵymanov («Qazaqstan» telearnasy), Botagóz Bazarbaeva («24KZ» telearnasy), Anna Abramova («KTK» telearnasy); «Merzimdi baspasózdegi úzdik materıal» – Gúlnar Joljan («Egemen Qazaqstan» gazeti), Gúljıǵan Tursynova («Jetisý» oblystyq gazeti), Raýshangúl Nurshaeva («Lıter» gazeti); «Internet-basylymdaǵy úzdik jarııalanym» – Janar Serdalına («BestNews.kz» aqparat agenttigi), Nadejda Alıshpaeva («Tengrinews.kz» aqparat agenttigi); «Áleýmettik jelilerdegi úzdik jazba» – Erjan Jaýbaı (jýrnalıst); «Jyldyń arnaıy syılyǵy – Úzdik analıtıkalyq materıal» – Aqbópe Táńirbergen jáne «Eýrazııa Birinshi arnasy» telearnasy «Zań men El» baǵdarlamasynyń ujymy, Prezıdent Teleradıokesheni «Jibek Joly» telearnasynyń ujymy; «Parlamenttik jýrnalıstıkany damytýǵa qosqan úlesi úshin» – Sovethan Jaǵıev («Qazaqstan» telearnasynyń vıdeooperatory).
