Elimizde «Qazaqstanda jasalǵan» aksııasy bastaldy

ASTANA. 16 aqpan. «Qazaqstan-2050» Jalpyulttyq qozǵalysynyń belsendileri «Qazaqstanda jasalǵan» respýblıkalyq aksııasyn jarııalady. Ol boıynsha ıgi ister bastalyp ta ketti. Bul týraly «Qazaqstan-2050» jalpyulttyq qozǵalysynyń baspasóz qyzmeti habarlady. Osy aıdyń 11 kúni ótken Úkimettiń keńeıtilgen otyrysynda Memleket basshysy Nursultan Nazarbaev otandyq óndirýshilerdi qoldaýǵa shaqyrdy. Sóıtip, «Qazaqstanda jasalǵan» jalpyulttyq aksııasyn bastaýdy usynǵan edi. Aksııa barysynda saýda jelilerinde satylatyn qazaqstandyq ónimder kózge birden túserdeı erekshe kórsetilip qoıylady. Otandyq óndirýshilerdiń taýaryn satyp alǵysy keletin azamattarǵa bul óte qolaıly. «Barlyq qazaqstandyqtardy, búgingideı qıyn jaǵdaıda, bizdiń, qazaqstandyq taýarlardy satyp alýǵa shaqyramyn. Bul Qazaqstan ekonomıkasyna qosqan úlesimiz dep bileıik», degen bolatyn Elbasy. Prezıdent úndeýinen keıin «Qazaqstan-2050» jalpyulttyq qozǵalysynyń belsendileri birden iri dúken jelilerimen jáne óndirýshilermen kelissóz júrgizýdi bastap ketti. Qoǵamdyq uıymnyń aksııa ótkizý týraly usynysyn alǵashqylardyń biri bolyp «A2» sýpermarketter jelisi qoldap, dúkenderiniń birinde «Qazaqstanda jasalǵan» aksııasy bastaý aldy. Nátıjesinde, óndirýshilerdiń ónimderi ornalasqan saýda sóreleriniń tusyna «Qazaqstanda jasalǵan» dep jazylǵan túrli-tústi belgi-taqtaıshalar qoıyldy. Bul qazaqstandyq ónimdi erekshelep, satyp alýshylar úshin tartymdylyǵyn arttyrady. – Jyldar boıy elimiz meni jáne men sııaqty myńdaǵan qazaqstandyqtardy qoldap keldi. Joǵary bilim alyp, biliktiligimizge saı kóńilge qonymdy jumys taptyq, otbasyn quryp, qýanyshqa bólendik. Qazaqstanymyzǵa, elimizge qoldaý kórsetetin kezek endigi de bizge kelip otyr. Qazaqstandyq ónimdi satyp alý arqyly biz tek el ekonomıkasyna ǵana kómektesip qoımaımyz, sondaı-aq otandyq kásiporyndarda eńbek etip júrgen myńdaǵan adamdarǵa qoldaý kórsetemiz. Olar bizdiń arqamyzda jumysyn jalǵastyrady, otbasyn asyrap, urpaq órbitedi, dárigerler men muǵalimderdiń eńbekaqysy úshin salyq tóleıdi. Biz qazaqstandyq ónimdi qajet bolǵandyqtan emes, solaı durys bolǵandyqtan satyp alamyz, dedi «Qazaqstan-2050» Jalpyulttyq qozǵalysy keńesiniń tóraǵasy Danat Jumın. Búginde belsendiler elimizdegi barlyq iri saýda jelilerimen kelissózder júrgizýde. «Qazaqstanda jasalǵan» degen jazýy bar belgilerdi búkil qazaqstandyqtar jýyq arada kóredi degen senimdemiz. Nurbaı Elmuratov. Derek: «Qazaqstan-2050» jalpyulttyq qozǵalysynyń baspasóz qyzmeti. Sýret: «QazAqparat».