Sýret: inbusiness.kz
Memleket basshysy: «Qalalar men aýyldardyń sáýletti, saıabaqtar men aýlanyń taza bolýy, eń aldymen, basqaǵa emes, ózimizge kerek», degen edi. Osyǵan oraı, Abaı oblysynyń ákimi Berik Ýálı óńir turǵyndaryna beıne úndeý jasap, árbir turǵyndy týǵan jerdiń tazalyǵyna, kórkeıýine birge úles qosýǵa shaqyrdy.
«Abaı oblysy – uly tulǵanyń atymen atalǵan, Alash arystarynyń izi qalǵan tarıhy tereń, tabıǵaty kórkem óńir. Bul – bizdiń ortaq úıimiz. Ony taza, jaıly, kórikti etip ustaý – árqaısymyzdyń azamattyq boryshymyz. Shyn máninde, bizdiń óńir toǵyz joldyń torabynda tur. Ertistiń eki jaǵasyn jalǵaǵan jalǵyz kópirden eki alyp kórshimizge qaraı kólik aǵyny ótedi. Bul turǵydan alǵanda Semeıimiz aımaqtyq kólik-logıstıkalyq habqa aınalyp keledi. Bul bizge úlken múmkindik bergenimen, zor jaýapkershilik te júkteıdi. Shaharymyzdyń tazalyǵy men óńirimizdiń abyroıy synalatyn da osy tus. Aımaq ekonomıkasy, óneri men mádenıeti, ekologııasy men tazalyǵy – barshamyzǵa ortaq. Tazalyq degenimiz – jylyna bir ret senbilikke qatysý emes, bul – óńirde qalyptasýǵa tıis úlken mádenıet», degen edi oblys ákimi.
Úndeýge ún qosqan Abaı jurtshylyǵy tazalyqqa rasynda myqtap kiristi. Tabıǵı resýrstar jáne tabıǵat paıdalanýdy retteý basqarmasynyń ókili Bekbolat Muratovtyń aıtýynsha, Abaı oblysynda «Taza Qazaqstan» aksııasy qarqyndy, josparǵa saı júrip jatyr.
«Kóktemgi eki aılyq tazalyq marafonyna óńir turǵyndary belsene qatysyp, abattandyrý jumysy atqaryldy. Aksııaǵa 100 myńnan astam adam atsalysyp, qalalar men aýyl-aýdan kósheleri tazartylyp, abattandyrylyp jatyr. Sonymen qatar polıgondarǵa 20 myń tonnadan astam qaldyq shyǵaryldy, 500-den astam sý aıdyny tazartyldy, olardyń jaǵalaýyna ondaǵan myń jańa kóshet otyrǵyzyldy. Tek «Semeı ormany» rezervatynyń ózinde ǵana 1,5 ga aýmaqta jastar men korporatıvtik eriktilerdiń qatysýymen kóshet otyrǵyzý aksııasy ótti», deıdi maman.
Tal egý kúnine oraı oblys aýmaǵynda 23 myńnan astam kóshet egilgen. Eń ózekti máselelerdiń biri – qoqys úıindileri. Ǵaryshtyq monıtorıng jumystarynyń nátıjesinde 266 qoqys orny anyqtalyp, oblys kóleminde ondaı úıindiler tolyǵymen joıyldy.
Oblys ákimi Semeı qalasyndaǵy kommýnaldyq tehnıkalardyń jumysyn arnaıy baryp tekserdi. Qaladaǵy tazalyq jumysyn kúsheıtý maqsatynda merdiger kompanııalarmen birlesip 60-qa jýyq jańa tehnıka satyp alý josparlanyp otyr. Búginde 10 jańa tehnıka iske qosyldy. Bul óz kezeginde 100-ge jýyq jańa jumys ornyn qurýǵa múmkindik beredi.
«Qala tazalyǵyna baılanysty turǵyndar tarapynan shaǵym az aıtylmaıdy. Sondyqtan bul baǵyttaǵy jumysty árdaıym nazarda ustap, tabandy túrde jalǵastyra beremiz. Qala kelbetin jaqsartý, tazalyqty saqtaý kúndelikti, júıeli jumysty qajet etedi», dedi óńir basshysy.
Arnaıy tehnıkalar qysta qar kúrep, kóktem, kúz aılarynda joldardy jýyp, tazalaýǵa, kóshelerdi sypyrýǵa, qum sebýge arnalǵan. Jańa tehnıkalar qalanyń ortalyq kóshelerinen bastap, barlyq shaǵyn aýdandar men turǵyn úı keshenderin tazalaýǵa jumyldyrylady.
Abaı oblysy
