Sýretti túsirgender – A.Dúısenbaev, E.ÚKIBAEV
Prezıdenttiń aıtýynsha, mundaı forýmnyń Qazaqstanda ótýi otandyq neırohırýrgııa jetistikteriniń keńinen moıyndalǵanyn kórsetedi. Sonymen qatar Memleket basshysy Kongress neırohırýrgııa salasyndaǵy halyqaralyq yntymaqtastyqty damytýǵa zor úles qosyp, ozyq tájirıbe men tehnologııa almasýǵa yqpal etetinine senim bildirdi.
– Ult saýlyǵy – kez kelgen eldiń qarqyndy damýynyń negizi. Sondyqtan densaýlyq saqtaý isin jan-jaqty órkendetý memlekettik saıasatymyzdyń negizgi basymdyǵy sanalady. Qazaqstan medısınalyq ınfraqurylymdy jańǵyrtýǵa, maman daıarlaýǵa, úderisterdi sıfrlandyrýǵa jáne atalǵan salaǵa ınnovasııalyq ázirlemelerdi engizýge mol qarjy bóledi, – dedi Prezıdent.
Qasym-Jomart Toqaev Qazaqstan neırohırýrgııada jasandy ıntellektini qoldanýǵa aıryqsha mán beretinine nazar aýdardy. Sol arqyly medısınanyń joǵary tehnologııaly salalaryn belsendi damytýdy qolǵa alǵanyn jetkizdi. Onyń aıtýynsha, sıfrly jáne robotty tehnologııalardyń arqasynda otandyq neırohırýrgııa salasy órkendep keledi.
Memleket basshysy kezdesýge qatysýshylardyń álemdik medısınany damytýǵa qosqan eleýli úlesin erekshe atap ótti.
– Árqaısyńyz – myńdaǵan adamnyń ómirin qutqarǵan joǵary deńgeıli mamansyzdar. Sizderdi eń qıyn jaǵdaıda da adamdardyń dertinen aıyǵyp ketýine úmit syılaıtyn izgi mıssııa biriktiredi. Astanada ótip jatqan neırohırýrgter kongresine qatysý úshin arnaıy keldińizder. Bul medısınada shekara joq ekenin kórsetedi. Neırohırýrgııada ǵylym men ınnovasııa aıryqsha ról atqarady, – dedi Prezıdent.
Memleket basshysy Qazaqstan medısınalyq tehnologııalardy transfertteýge, sondaı-aq tájirıbe almasýǵa baǵyttalǵan halyqaralyq yntymaqtastyqty keńeıtýge nıetti ekenin aıtty.
– Neırohırýrgııa sııaqty joǵary tehnologııaly salada medısınalyq týrızmdi damytý isiniń áleýeti zor. Osy baǵytta tabysqa qol jetkizý úshin ornyqty memleketaralyq baılanysty jolǵa qoıýǵa daıynbyz, – dedi Prezıdent.
О́z kezeginde kezdesýge qatysýshylar Qazaqstandaǵy neırohırýrgııany damytý múmkindikterin joǵary baǵalap, maman daıarlaý jáne ozyq tehnologııamen almasý turǵysynan qoldaý bildirýge ýaǵdalasty.
Qasym-Jomart Toqaev mazmundy ári nátıjeli pikir almasý úshin rızashylyǵyn bildirdi. Sondaı-aq Densaýlyq saqtaý mınıstrine neırohırýrgııaǵa, jalpy medısına salasyna ozyq tehnologııalardy engizý sharalaryn jandandyrýdy, Qazaqstanda sheteldikterdi emdeý boıynsha kórshi memlekettermen úkimetaralyq kelisim jasaý týraly Ulttyq neırohırýrgııa ortalyǵynyń basshysy Serik Aqsholaqovtyń usynysyna qatysty jumys júrgizýdi tapsyrdy.
Jıynda Ýolter Edýard Dendı atyndaǵy neırohırýrgııalyq qoǵamdastyqtyń prezıdenti, Djordj Vashıngton ýnıversıtetiniń (AQSh) neırohırýrgııa boıynsha professory Salım Abdýlraýf, N.N.Býrdenko atyndaǵy Ulttyq medısınalyq neırohırýrgııany zertteý ortalyǵynyń (Reseı) ǵylymı jetekshisi jáne qurmetti prezıdenti Aleksandr Konovalov, Great Ormond Street aýrýhanasynyń (Ulybrıtanııa) balalar neırohırýrgııasy men kranıofasıaldy hırýrgııa bóliminiń jetekshisi, University College London oqý ornynyń balalar neırohırýrgııasy boıynsha professory Nýr ýl Oveıs Djılanı, Humanitas IRCCS zertteý aýrýhanasynyń (Italııa) «gamma-pyshaq» jáne stereotaksıkalyq neırohırýrgııa departamentiniń dırektory Pero Pıkossı, QR Densaýlyq saqtaý mınıstri Aqmaral Álnazarova, «Ulttyq neırohırýrgııa ortalyǵy» AQ basqarma tóraǵasy Serik Aqsholaqov sóz sóıledi.
