foto: ashyq derekkóz
Investısııaǵa arnalǵan tarıf elektr stansııasy men jeli ıelerine óz aktıvterin tıimdi ustaý úshin kóbirek aqsha jınaýǵa múmkindik beredi. Energetıka mınıstrligi kóterme saýda naryǵynda jabyq básekelestik ornatty jáne elektr stansııalaryna arnalǵan barlyq tarıfter mınıstrliktiń buıryǵymen belgilenedi.
«Bul - ekonomıkamyzda eń úlken sybaılas jemqorlyq táýekelderin týdyrady. Tarıftiń nebári 1 teńgege shamadan tys kóterilýi elektr stansııalarynyń ıelerine jylyna jalpy alǵanda 100 mıllıard teńgege jýyq tabys ákeledi jáne olar tarıftiń shekten tys kóterilýine úlken yntalandyrýǵa ıe. Buǵan jol bermeýdiń jalǵyz joly – naryqty ashý jáne baǵa belgileýdi toqtatý. 1998 jyly kóterme naryqtaǵy tarıf naryqtyq kúshterdiń áreketinen 3 esege tómendedi», deıdi táýelsiz sarapshy Aset Naýryzbaev.
Prezıdent janyndaǵy QSZI Ekonomıkalyq saıasatty taldaý bóliminiń bas sarapshysy Ásel Ábenniń aıtýynsha baǵdarlamany iske asyrýǵa 3 trıllıon teńge qarastyrylǵan. Bólingen qarjyǵa 61,9 myń shaqyrymdy quraıtyn ınjenerlik jelini jańartý arqyly tozý deńgeıin 20%-ǵa deıin tómendetý jumystary bekitilgen.
«Alaıda baǵdarlamany iske asyrý barysynda birqatar shekteýler oryn aldy. Infraqurylymdyq jobalardyń ótelý merziminiń uzaqtyǵy olardy bıznes úshin tartymdylyǵyn tómendetedi. Qyzmet sapasy jaqsarǵanyna qaramastan, tarıfterdiń ósýi áleýmettik shıelenisti týdyryp, ásirese tabysy tómen halyq arasynda narazylyqqa ákelýi múmkin. Sonymen qatar, keıbir óńirlerde tehnıkalyq jaǵynan kúrdeli jobalardy júzege asyrýǵa qabiletti merdigerlik uıymdar men bilikti mamandar jetispeıdi. Munyń barlyǵy jańǵyrtý qarqynynyń baıaý jumys isteýine jáne shyǵyndardyń artýyna sebep bolýy múmkin», deıdi sarapshy.
