28 maýsymda Elbasy Nursultan Nazarbaev ótkizgen telekópir barysynda úlken bir shara qazynaly túbekte ótken bolatyn. Sol sharaǵa gazettiń menshikti tilshisi de qatysqan bolatyn.
Mańǵystaý oblysynan – Jolaman BOShALAQ:
Kaspıı teńiziniń qazaqstandyq bóligin ıgerýdiń memlekettik baǵdarlamasyna oraı teńizdegi kólikter sany da óse túsetini belgili. Taıaýdaǵy 4-5 jyl shamasynda tek qana baılyǵy shalqar Qashaǵan jobasyna saı 200-ge tarta aýyr tonnajdy kemeler tasymal jumystaryna qosylmaqshy. Al olarǵa túrli tehnıkalyq qyzmet kórsetetin zaýyttar ázirge óz elimizde joq bolatyn. Jóndeý jumystaryn kórshi Reseı, Ázirbaıjan elderinde júrgizý ári kúrdeli, ári qymbat. Sondyqtan da Elbasy tapsyrmasy men qamqorlyǵy nátıjesinde teńiz jaǵalaýyn jaılaǵan Túpqaraǵan aýdanyna qarasty Baýtın kentinde jańa keme jóndeý zaýyty salynyp, paıdalanýǵa berildi. Sóıtip, egemen elimizdiń tarıhynda keme jóndep, olarǵa servıstik qyzmet kórsetetin alǵashqy zaýyt Elbasynyń sát-sapar tileýimen iske qosyldy.
Zaýyttyń qural-jabdyqtary amerıkalyq “Marine Travelift” kompanııasynda jasalǵan. Zaýyt Kaspıı tósinde tasymalmen aınalysatyn kemeler men barjalardy jóndeıtin boldy. Ol tolyq qýatyna qosylǵanda jylyna 60 kemege, al bir mezgildiń ózinde 8 kemege tehnıkalyq qyzmet kórsete alady. Joba eki jyl ishinde júzege asty. Zaýytta júzden astam jergilikti turǵyn jumyspen qamtylýda.
Jaqyn jyldarda el “qara altynynyń” 40 paıyzyn teńiz arqyly tasymaldaý osyndaı irgeli istiń nátıjesinde bolmaqshy. Bular jaıly oblys ákimi Qyrymbek Kósherbaev Elbasyna baıandady. Odan ári “Keme jasaý zaýyty” seriktestiginiń bas dırektory Pol Steıhs, “Qazaqteńizkóliktasymaly” JShS bas dırektory Marat Ormanov Nursultan Ábishulyna zaýyttyń mán-mańyzy, keremetteı keleshegi, ondaǵy zamanaýı qural-jabdyqtar jaıly aıtyp berdi.
Telekópir sońynda Elbasy Nursultan Nazarbaev qazynaly túbekte qolǵa alynyp, júzege asqan ıgilikti iske sáttilik tilep, jınalǵandardy qýanyshty sátterimen quttyqtady.
__________________________________
TAǴY BIR TAÝARLY - SÚT FERMASY Qostanaı oblysynda kezekti ınvestısııalyq joba iske asyryldy Qostanaı oblysynda ınvestısııalyq jobalar qatarynan kezekti óndiris iske qosyldy. Qostanaı oblysynyń Sadchıkov aýylynda 400 bas asyl tuqymdy saýyn iri qara malǵa arnalǵan joǵary tehnologııaly iri taýarly — sút fermasy ashyldy. Jobany “Sadchıkovskoe” JShS iske asyryp otyr. Jalpy quny – 806 mln. teńgeden asady, onyń 685 mln. – 2001-2014 jyldarǵa arnalǵan Memlekettik ındýstrııalyq-ınnovasııalyq baǵdarlama sheńberinde “QazAgroQarjy” AQ jelisi boıynsha jáne respýblıkanyń Ulttyq qorynan “QazAgro” Ulttyq holdıng kompanııasyna bólingen qarajaty esebinen qarjylandyrylǵan. Bul Qostanaı oblysynda otandyq lızıngilik kompanııamen qarjylandyrylyp otyrǵan birinshi ınvestısııalyq joba emes. О́tken aptada oblystyń Fedorovskoe aýdanynda “Turar” JShS iri taýarly-sút fermasy iske qosyldy. Oǵan “QazAgroQarjy” óziniń bıýdjettik baǵdarlamasy sheńberinde 435 mln. teńgeden artyq qarjy ınvestısııalady. Dál sol kúni, biraq Qostanaı aýdanynyń Jdanovka selosynda “Jas qanat” Broıler fabrıkasy” JShS iri qus fabrıkasynyń jelisi iske qosylǵan. Bul jobany iske asyrý barysynda “QazAgroQarjy” qurylys-montaj jumystary men jabdyq satyp alýǵa 410,3 mln. teńge qarjy bóldi. Sadchıkovka selosyndaǵy qazirgi zaman sút kesheniniń jobalyq qýaty jylyna 3 200 tonna sút ónimi. Qostanaı oblysy boıynsha jáne taıaý jatqan aımaqtarda sútti ár túrli ashyǵan sút ónimderine qaıta óńdeý josparlanýda. “Sadchıkovskoe” jaýapkershiligi shekteýli seriktestiginde saýyn iri qara mal turatyn óziniń qoldanystaǵy taýarly-sút fermasy bar. Fermada mal saýý úshin eski saýý apparattary qoldanylady. Búgingi tańda josparlanǵan qarajat sheńberinde 294,4 mln. teńge kólemine keshenniń qurylysy, sonymen qatar saýý zaly men mal ustaýǵa arnalǵan jańa jabdyq satyp alýǵa qarjylandyryldy. Sonymen birge “QazAgroQarjy” aksıonerlik qoǵamynda sharýashylyqqa venger seleksııasynyń golshtıno-frız asyl tuqymynyń maldaryn satyp alý máselesi sheshilý ústinde. Jańa fermanyń arqasynda 42 jumys orny qurylmaqshy. Iri taýarly-sút fermasy iske qosylysymen sút ónimderiniń ımporty qysqaryp, aımaq turǵyndary jergilikti óndiristiń sapaly sútimen jáne odan qaıta óńdelgen ónimdermen qamtamasyz etiletin bolady dep kútilýde. Jalpy, osy ýaqytqa “QazAgroQarjy” kompanııasynda ekinshi irikteý kezeńi barysynda ár túrli ınvestısııalyq jobalardy iske asyrýǵa arnalǵan 80-nen asa ótinim kelip tústi. Onyń 14 ótinimi taýarly-sút fermasynyń qurylysyn qarjylandyrýǵa arnalǵan. Búgingi tańda kompanııanyń nesıe komıtetimen qoldanystaǵy óndiristerge taǵy da qosymsha 4 joba maquldandy, olar elimizdiń túrli aımaqtarynda iske asyrylatyn bolady. Tórt joba qaralý ústinde. “QazAgroQarjy” 2009 jyldan bastap qazirgi zaman iri taýarly-sút fermalaryn qurý, qus fabrıkalarynyń, jylyjaı sharýashylyqtarynyń, kókónis qoımalarynyń jelilerin qurý jáne damytý, aýyl sharýashylyǵy tehnıkalaryn qurastyrý óndiristerin uıymdastyrý, jemis-kókónis, tehnıkalyq jáne maı daqyldaryn óndirýde tamshylatyp sýarý tehnologııasyn engizý sııaqty elimizdiń aýyl sharýashylyǵyndaǵy alty baǵytta perspektıvalyq jobalardy qarjylandyryp keledi. Investısııalyq jobalar 12 jyl merzimge deıin jyldyq 6 paıyz sharttarynda jáne 2 jylǵa deıin negizgi boryshty óteý boıynsha jeńildikti kezeńmen Ulttyq qor qarajatynan qarjylandyrylady. “Egemen-aqparat”.
