Fotolar: Qorǵanys mınıstrligi
Áýe kúshteriniń negizgi mindeti – áýe keńistigin qorǵaý, strategııalyq mańyzdy nysandardy búrkemeleý. Qurlyq áskerleriniń áreketine qoldaý kórsetý.
Qorǵanys mınıstrliginiń baspasóz qyzmetiniń málimdeýinshe, bólimsheler zamanaýı ushaqtarmen jáne tikushaqtarmen jabdyqtalǵan. Olardyń qatarynda kópfýnksıonaldy Sý-30SM, Sý-27 joıǵysh ushaqtary, L-39 oqý-jaýyngerlik, Mı-171Sh jáne Mı-35M kóliktik-jaýyngerlik jáne soqqy berýshi tikushaqtary, sondaı-aq Airbus Military shyǵarǵan A-400M ushaqtary bar.
Áskerı-áýe kúshteri úshin kásibı kadrlardy Aqtóbedegi Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynda daıarlaıdy. Instıtýt túlekteri ushqyshtar, shtýrmandar, tehnıkter jáne áskerı avıasııa quramynyń basqa da mańyzdy sanattarynyń qataryn tolyqtyrady.
О́zgermeli geosaıası jaǵdaıda áýe kúshteri damýyn jalǵastyryp jatyr. Osyǵan sáıkes oqý baǵdarlamalary qaıta qaraldy. Daıyndyqtyń jańa ádistemeleri engizilip, halyqaralyq jáne túraralyq oqý-jattyǵýlarǵa qatysý jandanyp otyr. Mundaı is-sharalar tájirıbe almasýǵa, odaqtastarmen qarym-qatynasty shyńdaýǵa jáne jaýyngerlik daıyndyq deńgeıin arttyrýǵa múmkindik beredi.
Qazaqstan ushqyshtarynyń kásibıligi men adaldyǵyn kórsetken jarqyn epızodtardyń biri 2024 jylǵy kóktemgi sý tasqyny kezinde boldy. Kúrdeli aýa raıy jaǵdaıynda tikushaqtar men ushaqtardyń ekıpajdary turǵyndardy sý basqan eldi mekenderden evakýasııalaýdy qamtamasyz etti. Bir aıda 600-ge jýyq ushý oryndalyp, 3,5 myńnan astam adam qutqaryldy. Eki myńǵa jýyq maman jáne 280 tonnadan astam gýmanıtarlyq júk tasymaldandy.
Atalǵan jetistikterdiń artynda ushý jáne ınjenerlik quram, baılanysshy, meteorolog, tehnık jáne azamattyq qyzmetkerler sekildi úlken ujymnyń kúndelikti jumysy tur. Olardyń kásibıligi Qazaqstannyń senimdi jáne zamanaýı avıasııasynyń negizi deýge turarlyq.
