«Ulttyq statıstıka bıýrosynyń derekterine sáıkes, 2024 jyly elimizde jazataıym oqıǵalardan, ýlanýlar men jaraqattardan bolatyn ólim-jitim kórsetkishi ár 100 myń adamǵa shaqqanda 51,8-di qurady. Sońǵy 5 jyl ishinde jaraqattan bolatyn ólim-jitim 19%-dan astam azaıdy. Al Aqmola, Qostanaı, Soltústik Qazaqstan oblystarynda jáne Almaty qalasynda bul kórsetkish 23%-dan 38%-ǵa deıin tómendegen», deıdi O.Bekarysov.
Onyń aıtýynsha, jaraqattan bolǵan ólim-jitim eldegi jalpy ólim-jitim qurylymynda 8%-dy quraıdy.
Jazataıym oqıǵalardan, ýlanýlar men jaraqattardan bolǵan ólim sebepteriniń qurylymynda:
-
kisi óltirý – 4,3%,
-
ózin-ózi óltirý – 11,4%,
-
jol-kólik apattary – 23,5%-dy quraıdy.
Jaraqattan bolǵan ólim-jitim boıynsha segiz oblys «qyzyl aımaqqa» engizilgen. Al 2023 jylmen salystyrǵanda Ulytaý, Atyraý oblystarynda jáne Astana qalasynda bul kórsetkishtiń tómendegeni baıqalady.
«2024 jyly bul kórsetkish ár 100 myń adamǵa shaqqanda 12,2 boldy, bul 2023 jylmen salystyrǵanda 8,6%-ǵa tómen. Degenmen, Qazaqstan jol apattarynan bolatyn ólim boıynsha EYDU elderinen aıtarlyqtaı artta qalyp otyr. Eń tómen kórsetkish Japonııada, sondaı-aq Eýropa elderiniń tájirıbesi de nazar aýdarýǵa turarlyq», dedıi ol.
Bas prokýratýranyń málimetinshe, 2024 jyly jol apattarynyń tirkelý sany 2023 jylmen salystyrǵanda 98,9%-ǵa ósken.
Oljas Bekarysovtyń túsindirýinshe, Ishki ister mınıstrliginiń Ákimshilik polısııa komıteti muny bylaı túsindiredi: 2024 jyldan bastap jol apatyna túsken azamattar dárigerlik kómekke júginse, densaýlyǵyna zııan kelmegenine qaramastan, barlyq oqıǵa statıstıkaǵa engiziledi. Buryn tek medısına tarapynan zııan keltirilgeni dáleldengen oqıǵalar ǵana esepke alynatyn.
Barlyq JKO-nyń 55%-y alty óńirge tıesili: Almaty qalasy, Almaty oblysy, Jambyl oblysy, Astana qalasy, Aqtóbe oblysy jáne Shymkent.
2024 jyly jol apattarynan 40 873 adam zardap shekti, onyń ishinde 2 452 adam qaza tapty.
Sondaı-aq spıker jyldamdyqtyń artýy jol apattarynyń saldaryn aýyrlatatynyn atap ótti. Ortasha jyldamdyqtyń árbir 1 km/saǵ-qa artýy jaraqatpen aıaqtalatyn JKO yqtımaldyǵyn 3%-ǵa, al ólimmen aıaqtalatyn apattyń qaýpin 4–5%-ǵa arttyrady.
Saǵatyna 80 km-den joǵary jyldamdyqpen qozǵalǵanda, jaıaý júrginshiniń qaza tabý yqtımaldyǵy 90%-dan asady. Qalalyq jerde jyldamdyqty 60-tan 50 km/saǵ-qa tómendetý jaıaý júrginshi ótpelerinde ólim-jitimdi 30–40%-ǵa qysqartady.
DDSU statıstıkasy boıynsha, qaýipsizdik beldigin qoldaný ólim qaýpin 40–50%-ǵa, al aýyr jaraqat alý qaýpin 25%-ǵa deıin tómendetedi.
