Byltyr elimizde oıyn bıznesi jáne lotereıa qyzmeti máseleleri boıynsha zańnamaǵa túzetýler kúshine endi. Endi Qylmystyq kodekstiń 307-babyna sáıkes zańsyz oıyn bıznesin uıymdastyrǵany úshin bas bostandyǵynan aıyrý jazasy belgilengen. Máselen, «Zańsyz oıyn bıznesin uıymdastyrý» boıynsha QK 307-babynyń 3-bóliginde oıyn mekemesin zańsyz ashý ne ustaý nemese oıyn bıznesi salasyndaǵy qyzmetti zańsyz uıymdastyrý, sol sııaqty zańsyz oıyn bıznesi úshin úı-jaılar berý ne Qazaqstan Respýblıkasynyń oıyn bıznesi týraly zańnamasynda belgilengen oryndardan tys qumar oıyndaryn uıymdastyrý jáne ótkizý, elektrondyq kazıno jáne ınternet-kazıno qyzmetin uıymdastyrý ne oıyn bıznesi salasyndaǵy qyzmetti lısenzııasyz júzege asyrý – aýyrlatatyn jaǵdaılarda múlki tárkilenip, tórt jyldan jeti jylǵa deıingi merzimge bas bostandyǵynan aıyrýǵa jazalanady.
Alaıda, osyndaı qatań sharalarǵa qaramastan, aýyrdyń ústi, jeńildiń astymen júrip, ońaı oljanyń sońynda zańdy attap ótetinder áli de bar. Jyl basynan beri júrgizilgen aýqymdy reıdter men tekserýlerdiń nátıjesinde oıyn avtomattary men kazınolardyń 47 jasyryn zaly joıyldy. Bul rette 215 birlik stasıonarlyq avtomat, qumar oıyndarǵa arnalǵan mobıldi termınal tárkilendi. Sonymen qatar zańsyz onlaın-kazınolar men stavkalardy usynatyn saıttarǵa 11 300-den astam siltemeler buǵattaldy. Buǵattalǵan alańdardyń qatarynda .kz domendik aımaqtary bar resýrstar, sondaı-aq qazaqstandyq zańnamany aınalyp ótýde belsendi jumys isteıtin platformalar bar.
QMA zańsyz oıyn bıznesimen kúres tek salyq túsimderin qorǵaýǵa ǵana emes, sonymen qatar áleýmettik táýekelderdi azaıtýǵa da baǵyttalǵanyn atap kórsetedi. Agenttik qazaqstandyqtardy shet qalmaýǵa jáne oıyn qyzmetiniń faktileri týraly habarlaýǵa shaqyrady.
«Lýdomanııa halyqtyń aıtarlyqtaı qarjylyq shyǵyndaryn týdyrady, qylmys deńgeıiniń ósýine jáne otbasylyq shıelenisterge ákeledi. Zańsyz oıyndardyń árbir qatysýshysy nemese uıymdastyrýshy qylmystyq shemanyń bir bóligine aınalyp, aınalasyndaǵylardyń ómirin buzady, ekonomıkaǵa zalal keltiredi. Qaýipsizdik árkimniń jaýapkershiliginen bastalatynyn esten shyǵarmańyz», dep jazady agenttik.
IIM ishki qaýipsizdik qyzmetteri men qarjylyq monıtorıng birlesken operasııalardy jalǵastyrýdy, sondaı-aq qarajatty jylystatýdy toqtatý úshin oıyn bıznesimen baılanysty valıýtalyq operasııalardy baqylaýdy kúsheıtýdi josparlap otyr.
