Sýret: senate.parlam.kz
Senat depýtaty Talǵat Júnisov Aqmola oblysynyń Aqkól aýdanynda boldy. Ol áleýmettik mekemelerdiń qyzmetimen, bilim berý jáne ınfraqurylymdyq jobalardy iske asyrý barysymen tanysty. Sondaı-aq senator Aqkól qalasynda ómiri qıyn jaǵdaıǵa tap bolǵan balalardy qoldaý ortalyǵyna bardy. Ondaǵy júzdesýlerde ınklıýzıvti jáne qaýipsiz orta qurý, balalardyń barlyq sanatyna bilim berý jáne áleýmettik qyzmetke teń qoljetimdilikti qamtamasyz etýdiń mańyzy atalyp ótti. Sapar barysynda agroónerkásip keshenine maman daıarlaý máselesi de nazardan tys qalmady. Aqkól qalasyndaǵy agrotehnıkalyq kolledjdegi túlekterdiń suranysy, dýaldy oqytýdy damytý jáne oqý baǵdarlamalaryn jańǵyrtý jaıy talqylandy.
Al Senat depýtaty Sergeı Ershov Qaraǵandy oblysyna bardy. Ol Osakarov aýdanyndaǵy birqatar áleýmettik mańyzdy nysandy aralady. Ortalyqta balalar men jasóspirimderdiń jan-jaqty damýyna yqpal etetin túrli úıirmeler men seksııalar bar.
«Jastar» sııaqty ortalyqtar jas urpaqtyń boıynda durys baǵdar qalyptastyrady. Munda daryndar dúnıege keledi, bolashaq kóshbasshylar tárbıelenedi. Memleket qosymsha bilim berýdi qoldaýǵa erekshe nazar aýdarýy kerek, ásirese aýyldyq jerlerdegi osyndaı mekemeler balalar men jasóspirimder kóp baratyn damý ortalyǵyna aınalýǵa tıis», dedi S.Ershov.
Súıindik Aldashev pen Bekbol Orynbasarov Mańǵystaý oblysynyń halqymen kezdesti. Atap aıtqanda, senatorlar Munaıly aýdanynda aýdan turǵyndarymen jáne máslıhat depýtattarymen júzdesti. Olar bıýdjetti tıimdi josparlaý, jekemenshik mektepterdiń mártebesi, avtokólikti zańdastyrý rásimi jáne memlekettik satyp alý salasyndaǵy zańnamany jetildirýdiń ózekti máselelerin talqylandy.
Depýtattar jańa nysandarmen de tanysty. Aýdanda 1 200 oryndyq zamanaýı mektep, mádenı ortalyq jáne 150 tósektik aýrýhana boı kóterdi. Dárigerlerdiń eńbek jaǵdaıy men medısınalyq qyzmetterdiń sapasyn talqylaýǵa erekshe mán berildi.
Senatorlar Aqtaýǵa sapar barysynda kólik-logıstıkalyq ınfraqurylym nysandary – halyqaralyq áýejaı men teńiz portynda boldy. Onda Prezıdenttiń tapsyrmasy aıasynda aýqymdy jobalar iske asyrylyp jatyr.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev Túrkistan oblysyna sapary aıasynda Kentaý qalasynda boldy. Senator turǵyndarmen kezdesýde segizinshi saılanǵan Parlamenttiń úshinshi sessııasy barysynda qabyldanǵan negizgi zańnamalyq bastamalar týraly aıtty. Ol Prezıdent Qasym-Jomart Toqaevtyń saıası jáne ekonomıkalyq reformalaryn iske asyrý aıasynda Salyq, Bıýdjet jáne Sý kodeksteriniń jańa mátinderimen qosa birqatar júıe quraıtyn qujattar qabyldanǵanyn atap ótti. Kezdesýde Kentaý men oǵan jaqyn ornalasqan eldi mekenderdiń kóptegen jyldar boıy sheshilmegen ekologııalyq mártebesi máselesi kóterildi.
Turǵyndar kásipkerlikti damytý, jańa jumys oryndaryn ashý jáne ınfraqurylymdyq bastamalarǵa qatysty máselelerdi kóterdi. Senator kezdesýge qatysýshylarǵa belsendiligi úshin alǵysyn bildirip, «Halyq únine qulaq asatyn memleket» tujyrymdamasy aıasynda mundaı dıalog keńinen qanat jaıatynyna senim bildirdi.
