Foto: azattyq-ruhy.kz/
Saýda jáne ıntegrasııa birinshi vıse-mınıstri Aıjan Bıjanovanyń aıtýynsha, sáýirde áleýmettik ónimderdiń ortasha baǵa ındeksi - 1,6% bolsa, mamyrda ósý qarqyny - 1%-ǵa, al maýsymda - 0,7%-ǵa tómendegen.
«Keıingi aptada ósim 0,1% boldy. Sonymen qatar, úsh apta qatarynan kartop baǵasy 1,3%-ǵa arzandady. Al ótken aptada sábiz baǵasy 0,9%-ǵa tómendegen. Kúrish, qaraqumyq, jumyrtqa, un men makoron ónimderiniń baǵasy da túsip jatyr. Nan men sút baǵasy turaqty bolyp tur», dedi Aıjan Bıjanova.
Qazaqstanda otandyq azyq-túlik óndirisi artyp keledi. 2025 jyldyń 5 aıynda onyń kólemi 10,5%-ǵa ósip, 1,5 trln teńgeni quraǵan. Áleýmettik azyq-túlik taýarlarynyń ishinde qyzylsha qanty (4,6 myń tonnadan 64 myń tonnaǵa deıin), ósimdik maıy (316,3 myń tonnadan 376,8 myń tonnaǵa deıin), sary maı (13 myń tonnadan 15 myń tonnaǵa deıin), un (1,3 mln tonnadan 1,4 mln tonnaǵa deıin), ashytylǵan sút ónimderi (102 myń tonnadan 106 myń tonnaǵa deıin), óńdelgen sút (264 myń tonnadan 274,6 myń tonnaǵa deıin) taǵy basqalary eń kóp ósim kórsetken.
Úkimet Qazaqstandaǵy áleýmettik azyq-túlikterdiń baǵasy Eýrazııalyq ekonomıkalyq odaq (EAEO) elderi arasynda eń qoljetimdi baǵa ekenin málimdedi.
Mundaı qorytyndy EAEO elderindegi áleýmettik mańyzǵa ıe azyq-túlik taýarlarynyń naryqtyq baǵasyn salystyrý nátıjesinde belgili bolǵan. Máselen, Qazaqstanda taýyq jumyrtqasy, un, nan, kúnbaǵys maıy, tuz, kúrish, kartop, qyryqqabat, pııaz, sábizdiń eń tómen baǵasy tirkelgen.
Al qaraqumyq, qant, sıyr eti jáne sút boıynsha Qazaqstandaǵy baǵalar Belarýs elindegi baǵaǵa jaqyn. Sary maı boıynsha elimiz Belarýs pen Qyrǵyzstannan keıin úshinshi orynda, al qus eti boıynsha Belarýs pen Reseıden keıingi orynǵa jaıǵasqan.
Kommýnaldyq qyzmetter tarıfiniń ósý qarqyny retteledi
Birinshi jartyjyldyqta aqyly qyzmetter ınflıasııa ósiminiń negizgi faktory bolǵan (16,1%). Osyǵan baılanysty Úkimet kommýnaldyq qyzmetter tarıfiniń ósý qarqynyn retteý týraly sheshim qabyldady. Osyǵan baılanysty keı kommýnaldyq qyzmet qunynyń baǵasyn kóterý keıinge qaldyrylǵan. Mundaı sheshim azamattardyń qarjylyq júktemesin azaıtyp, ınflıasııa deńgeıin turaqtandyrýǵa múmkindik beredi.
